Maha-in Anti-CAA resolution ngaihtuah tum

Kerala leh Punjab assembly-ten Citizenship (Amendment) Act (CAA) 2019 duh lohna resolution an pass hnuah, Maharashtra-a Shiv Sena, National Cong­ress Party (NCP) leh Congress party ṭang­rual, Maha Vikas Aghadi (MVA) sorkar pawhin Assembly-ah resolution hi ngaihtuah ve leh an tum nai sawi a ni. 

Congress party thupuangtu, Raju Waghmare chuan, "Kan party senior leader Balasaheb Thorat chuan CAA chung­changa kan ngaihdan hi chiang takin a sawi tawh. Chief minister Uddhav Thacke­ray pawhin CAA kan dodal thu hi a sawi bawk a ni. MVA hruaitute chuan CAA chungchang resolution hi siam a nih dawn leh dawn loh an la ngaihtuah dawn a ni, a ti. 

Senior lawyer leh Congress leader, Kapil Silbal chuan CAA chu ram danpui kalh a ni tih sawiin, state assembly chuan CAA duhlohna resolution pass a, he dan hi ṭhiat leh tura phut turin ram danpui hnuaiah dikna an nei vek a ni, tiin a sawi. Surpeme Court-in CAA hi ram danpui kalh a ni lo tia a puan chuan lo dodal chhunzawm zel chu a harsa tawh dawn a ni, tiin a  sawi bawk. Hei vang hian he dan hi ṭhiah a nih leh theihna turin theihtawpa beih a ngai a ni,  a ti. 

Kerala sorkar chuan anti-CAA reso­lution a pass hnuah, Supreme Court-ah CAA khinna hi a thehlut tawh a ni. Punjab chief minister Amarinder Singh pawhin a kaihhruai Congress sorkar chuan Surpeme Court-a Kerala-in CAA a khinna hi a zawm ve dawn tih a sawi.