Party-ten fund Rs vbch 2,100 dawng

Delhi-based think tank, Assocation for Democratic Reforms (ADR) data tihchhuahah a lan danin, kum 2004-2015 chhunga state hrang hranga assembly inthlan neihnaah khan political party-ten fund an dawn zat chu cheng vaibelchhe 2,100 a tling.

State assembly neih tura atan hian party hrang hrangte fund dawn hi a tam viau laiin, hemi hun chhung veka Lok Sabha inthlan neih tur atana party-ten a sum faia an dawn erawh chu a hniam viau thung.

ADR data-in a tarlan danin, kum 2004-2015 inkar hian state assembly inthlan vawi 71 a awm hman a, hemi atana party fund dawn chu Rs vbch 2,107.80 a ni a, sum hmuh zinga 63% chu a sum faia dawn a ni. Kum 2004, 2009 leh 2014 khan Lok Sabha inthlan neih a ni bawk a, Lok Sabah inthlan atana sum an dawn chu Rs vbch 1,039.06 a ni. Fund dawn zinga 44% chu sum faia dawn a ni bawk.

Party hrang hrangte sum hmuh dan hi Election Commission of India-a statement an thehluh behchhana chhut a nih thu ADR chuan a sawi. Party-ten statement an thehluhah hian inthlan vuakveta sum an hmuh leh an hmanral zatte an tarlang a ni.

Regional party zingah Samaj≠wadi Party (SP) chuan fund a dawng hnem ber a, Rs vbch 118 la lutin, heng zingah Rs vbch 90.09 chu a hmang chhuak leh nghal a ni. Aam Aadmi Party (AAP) chu inthlan ṭum hnih, Lok Sabha 2014 leh Delhi assembly election-ah chauh chuh hman mah se, Rs vbch 51.83 a la lut hman a, AIADMK chuan pathumna niin a fund dawn hi Rs vbch 37.66 a tling.