Vawiinah Lok Sabha inthlan result puang dawn

Lok Sabha inthlanpui neih zawh taka vote tlate chu vawiin hian chhiarin, result puan a ni dawn ta.

Inthlan hi thawh sariha neih niin, a thawh tawpna ber leh thawh sarihna hi Inrinni liam ta, June 1 khan state leh Union Territor pasarihah constituency 57-ah neih a ni.

Lok Sabha 2024 inthlan hi April 19 aṭang khan neih ṭan niin, inthlan hian ni 44 a awh. Kum 1951-52 inthlanpui neih hnuah inthlanin a awh rei ber ṭum a ni. Lok Sabha inthlan neih rual hian Andhra Pradesh, Arunachal Pradesh, Odisha leh Sikkim-ah state assembly inthlan neih a ni a, state assembly 12 hnuaia constitency 25-ah by-election neih a ni bawk.

Inthlan thawh khatnaah hian vote 66.1% tlain, a thawh hnihnaah April 26-a neihah 66.71%, May 7-ah thawh thumna neihah vote tla 65.68%, thawh lina May 13-ah 69.16%, thawh ngana May 20-a neihah 62.15%, thawh rukna May 25-a neihah 63.37% leh a thawh sarihna, June 1-a neiha vote tla hi 58.34% a ni bawk.

India ram mipui tluklehdingawn 1.4 aṭangin vote nei mi mtd 968 an awm a, hei hi ram mipui zawng zawng aṭanga 70% a tling pha a, kum 2019 inthlanpui aiin vote nei hi mi mtd 150 in an pung.

Kumin inthlanpuia inbei ber, rorellai BJP kaihhruai National Democratic Alliance (NDA) chuan prime ministerial candiate atan PM nilai, Narendra Modi bawk an hmang leh. Hetih lai hian eptu party ṭangrual pawl, INDIA bloc erawh chuan prime ministerial candidate hi an nei lawk lo thung.

Tun ṭum inthlanpuiah hian party 744 aṭangin candidate 8,360 an awm a, heng zinga 16% chu national party-te candidate niin, state party candidate 6% leh independent candidate 47% an awm bawk. Hei hi kum 1996 inthlanpui hnua candidate an tam ber ṭum a ni.

National party paruk zingah Bahujan Samaj Party (BSP) chuan candidate ngah berin 488 an nei a, Bharatiya Janata Party (BJP)-in dawtin 441 an nei bawk. Congress-in 328, Communist Party of India (Marxist) in 52 leh, Aam Aadmi Party (AAP) in candidate 22 an nei. State party zingah Samajwadi Party chuan candidate 71 neiin an ngah ber a, Trinamool Congress-in candidate 48 an nei ve bawk. AIADMK-in 36, CPI-in 30, YSRCP-in 25, RJD-in 24 leh DMK-in candidate 22 an nei.

Candidate zingah hian hmeichhia 797 awmin, hei hi candidate awm zat aṭanga 9.53% a ni. BJP-in hmeichhe candidate 69 (15.45%) neiin, Congress-in 44 (13.41%) an nei. BJP chuan an candidate neih zat aṭanga 33% chu hmeichhe tan an dah a, JMM pawhin hetiang zat hi an dah bawk. Apna Dal (Soneylal) leh NPP chuan an seat chan zawng zawngah hmeichhe candidate vek an dah thung.

Chawh rualin constituency tinah candidate 15 zel awm ang an ni a, hetih lai hian state hrang hrangah candidate awm zat erawh a in ang lo hlawm hle. Telangana chu constituency tina candidate tamna ber niin, mi 31 zel awm ang an ni a, hetih lai hian Ladakh leh Nagaland-ah tlem berin, candidate pathum zel an awm thung. Constituency pakhata candidate tamna ber chu Tamil Nadu-a Karur bial a ni a, candidate 54 an awm a,an zinga 46 chu independent candidate an ni.

Kumin inthlana candidate-te kum hi chawhrualin kum 48 an ni. National party-te candidate zinga 13% chu kum 40 hnuai lam an ni bawk.

Candidate zinga 25% chu Lok Sabha MP ni tawh niin, 4% chu Rajya Sabha MP ni tawh an ni. Lok Sabha MP nilai zinga 327 ten inthlanah hian an chuh leh bawk a, minister nilai 53 an awm bawk. MP ṭanglai inthlan chuhte zingah 34 chuan party dang hmingin an chuh tawh thung a, heng zinga a tam zawk hi an party awmna phel vang te a ni.