Bengaluru-ah kum 133 chhunga June-a ruah sur tam ber ni thleng

India ram chhung hmun hrang hrangah ruahsur nasa avangin harsatna a thleng mek a, Bengaluru-ah pawh Pathianni khan ruah leh thli a thawk leh a, kum 133 chhunga June thlaa ruahsur tam ber ni a thleng.

Pathiannia Bengaluru-a ruah tla zat chu 111mm a tling a, Indian Meteorological Department (IMD) in a chhinchhiah danin, hemi hmaa he khawpuia June thlaa ruahtui tlak tam ber ṭum chu kum 1981, June 16 kha niin hemi ni hian ruahtui 101.6mm a tla a ni.

Bengaluru-ah hian chawhrualin thla khata ruahtui tla zat hi 110.3mm a ni a, mahse thla khata ruah an dawn zat hi Pathiannia ruahsurah khan a tla tling der a ni. Ruahsur nasa avang khan khawpui chhunga harsatna hrang hrang a thleng a, thingkung 100 chuang a tlu a, thingzar tla hrang hrangte chuan kawngpui, in leh motorte delhin an tichhe nual bawk.

Bangalore Electricity Supply Company (Bescom) pawhin harsatna tawkin, ruahsur nasa hian light pole, transformer leh service station te a tichhia a, Pathianni zan khan khawpui chhung hmun ṭhenkhatah chuan power supply an nei lo. Tui chhe paihna a ṭhat tawk loh avangin khawpui chhung tui a tling nasa a, motor tlanvelna thlengin a nghawng buai a ni.