Parliament-in dan ṭha lo tak a siam chuan Judge-ten roreltute hna an thawh a ngai : Ansari
Vice President hlui Hamid Ansari chuan Parliament-in dan ṭha lo tak a siam nih chuan court a thlen phah a, hetah judge-te chuan roreltute hna tur chu an lo thawhsak ta zawk ṭhin a ni, tiin a sawi.
Inrinni-a Delhi-a 'Sansad 2020' a hmanpuinaah, Ansari chuan, "Parliament leh assembly-te chuan an chunga roreltu thu tu anga awm tura phut an nih lohin dan ṭha tak tak an siam zawk ṭhin a ni," a ti. Rajya Sabha chairman hlui chuan Parliament chuan kum khatah rorel ni 60 a nei ṭhin tih sawiin, ram dangah chuan ni 120-150 te an nei ṭhin tih a sawi.
"Dan leh hrai siam tur chuan sawihona hun ṭha tak a awm tur a ni. Mahse tunah chuan parliament leh assembly session te chu a hming maia kalpui angin a lang a, thu tlemte sawiin ni reilote awmho hnuah an kalbo leh nghal mai a ni," a ti. Democracy ramah chuan mipuite lungawina leh an duhdan te chu thil pawimawh a ni tih a sawi. Mipuite rawn leh thurawn an lak dan pawh dik tak leh langtlanga taka kalpui a ni tur a ni, a ti bawk.