NDA sorkarin kum hnih a tling

Central-a BJP kaihhruai National Democratic Alliance (NDA) sorkar chuan nimin khan kum hnih a tling a, hmun hrang hrangah a lawmna buatsaih a ni.

Prime Minister Narendra Modi chu sorkar kum hnih tlin lawmna puala Saharanpur, Uttar Pradesh-a vantlang inkhawma tel turin a kal a, thu a sawi ang. PM hian vawiin-ah Shillong a pan bawk ang a, May 29-ah Karnataka, June 2-ah Odisha a tlawh bakah, Rajasthan pawh a tlawh dawn bawk a ni.

NDA sorkar kum hnih tlin lawmna neihpui tur hian minister-te pawh hmun hrang hrnagah an zin chhuak a, vantlang inkhawm buatsaihahte thu an sawi. Inrinni hian public broadcaster Doordarshan chuan kum hnih kalta chhunga sorkar hnathawh hrang hrangte tarlanna darkar nga awh tur mega show a tichhuak bawk ang.

BJP President leh party hruaitu dang≠te chuan nimin khan media house hrang hranga senior editor-te kawmin NDA sorkar hnathawh leh hlawhtlinna hrang hrangte an tarlang. Sorkar hmalakna avangin India chu khawvel huap pawhin dinhmun ṭha taka a invawrh chho a, growth rate pawh 7.6% a tling pha a ni, a ti.

Eptute chuan NDA sorkar chu na takin an bei let thung. Congress party chuan NDA in kum hnih ro a rel chhungin kawng hrang hrangin a hlawhchham tih sawiin, ram economy pawh a siamṭha thei lo niin a sawi. Congress hruaitu hlun, Ghulam Nabi Azad chuan, "BJP kaihhruai sorkar hi advertisement ringawt-a innghat a ni. Ram economy a siamṭha thei lo a, sector pawimawh tak takte chu a ngaihthah bawk. Pawisa hlutna a tlahniam a, thil man a san vak laiin hna thar siam kawngah a hniam ber ṭum a ni bawk. Prime Minister chuan kum khatah hna thar vaibelchhe 10 a tiam laiin, hna thar a siam zat hi nuai 1.32 chauh a ni thung" a ti.

Rajya Sabha-a eptu hruaitu ni bawk, Azad chuan kum hnih hman zawh tak chu ram tana hun duhawm lo tak a ni tiin, NDA sorkarin thawhchhuah langsar tak chu khawtlanga buaina siam te, BJP hruaituten midang pawi an sawi te, ṭulloa inhnialbuaina leh mipui tharum thawhna thlengte niin a sawi.

BJP thawhpui Shiv Sena pawhin NDA sorkar chu kawng hrang hranga hlawhchhamah a puh. Sorkar laipui chuan thil man sang zel tur a thunun thei lo a, ramri kaltanga firfiakte pawikhawihna thlen pawh a dang zo lo a, hei bakah hian kum hnih chhunga scheme a kalpuite chuan mipuite a thleng pha lo a ni, a ti. Ram pawn lama Prime Minister Modi a zin≠chhuak nasa lutuk pawh sawiselin, Sena chuan PM hian India ramah nge rampawn lamah a khawsak tih a hriatchian a ngai niin an sawi.

Delhi Chief Minister, Aam Aadmi Party (AAP) hruaitu Arvind Kejriwal pawhin Modi-a kaihhruai sorkar chu advertisement hmanga intihlar tumah puhin, kum hnih chhungin advertisment atan hian cheng vaibelchhe 1,000 a seng niin a sawi. Hei bakah hian sorkar kum hnih tlin lawmna atana inkhawm a buatsaiha a sum sen zat a zawt nghal bawk.