Rajnath Singh-a'n lei 44 a hawng
Ramchhunga state leh UT pasariha sipaite inkalpawhna kawng a awlsam zawk theihna atana Border Roads Organisation (BRO) siam lei 44 chu nimin khan union defence minister Rajnath Singh chuan video conference kaltlangin a hawng.
Heng lei 44 hi India khawthlang lam, hmar leh hmarchhak lama sipai leh civil mite chhawr ṭangkai tur a nih thu Singh chuan a sawi. "Kan sipaite chu inkalpawhna awm mumal loah te kan dah a, kan sipaiten inkal pawhna ṭha an neih theih nan Covid-19 hri leng karah hna thawh chhunzawm a ni," tiin a sawi bawk.
He lei hawnna hun inkhawmah hian Singh chuan, "Pakistan leh China lam aṭanga ramria in hmuh thiam loh chang a awm fo ṭhin a, a chhe ber pawh thleng mah se prime minister Narendra Modi rorelna hnuaiah India chuan a sipaite kawng engkimah a thuam ṭha em em a ni," tiin Modi a fak zui bawk. India chuan Pakistan leh China nen ramri km 7,000 vel zet a nei a, heng ram pahnihte hian ramriah harsatna an siam fo thu a sawi. Ramri buaina chinfel dan ngaihtuahin India chuan heng ram pahnihte hi diplomatic level bakah sipai hotute nena inbiakna pawh a lo neihpui fo tawh a ni.
Minister-in lei a hawnte hi Ladakh, Arunachal Pradesh, Sikkim, Himachal Pradesh, Uttarakhand, Punjab leh Jammu and Kashmir amite an ni. Lei 44 a hawn bakah minister hian Arunachal Pradesh-a Nechiphu Tunnel lungphum a phum bawk. He tunnel hi meter 450-a thui a ni.