Lok Sabha 2024 inthlan result puan a ni ta : A term thumna atan NDA-in sorkarna siam leh dawn
Lok Sabha 2024 inthlana vote tlate chu nimin khan ram pumah chhiar a ni a, chanchin buatsaih lai hian result kimchang hriat hman la ni lo mah se, Bharatya Janata Party (BJP) kaihhruai National Democratic Alliance (NDA) chuan central-ah a term thumna atan sorkarna an siam leh dawn tih a chiang tawh a ni. Prime minister Narendra Modi chu a term thumna atan India Prime Minister a ni leh dawn.
Lok Sabha-ah hian seat 545 awmin, heng zinga seat pahnih chu Anglo-Indian Community tana dah a ni. Seat 543-ah inthlan hi neih a ni a, sorkarna siam tur hian seat 272 neih phak a ngai.
Tun ṭum inthlanah hian NDA leh eptu party ṭangrual pawl, Congress party kaihhruai Indian National Developmental Inclusive Alliance (I.N.D.I.A) chu inbeiin vote chhiar lai pawhin an in um tawk hle. NDA chuan an in beisei ang an pha lo a, hneh taka tling leh ngei tura an inrin laiin sorkarna an siam pha hram dawn a, INDIA chu sorkarna siam pha chiah lo mah se rin phak bakin an che ṭha thung.
NDA leh INDIA bloc inthlauhna hi a tlem tak em avang leh, BJP hian sorkarna siam tura a thawhpui party-te chungah a innghah len tak avangin NDA hnuaia an thawhpui party hrang hrangte an pelhe hlauin ṭan an la nghal. Nimin tlai khan union home minister Amit Shah chuan NDA-a tel party hruaitute chu a be kual nghal a, BJP national president JP Nadda chenna inah hma lak dan tur an sawidun nghal bawk. NDA-ah hian party 20 chuang an tel a, BJP bakah Janata Dal United (JDU), Telugu Desam Party (TDP), National People's Party (NPP), Nationalist Congress Party (NCP), Shiv Sena, Asom Gana Parishad, Hill State People's Democratic Party, Indigenous People's Front of Tripura, Janata Dal (Secular), Lok Janshakti Party (Ram Vilas), Naga People's Front, Nationalist Democratic Progressive Party, Rashtriya Lok Janshakti Party, Sikkim Krantikari Morcha, Tipra Motha Party, United Democratic Party, United People's Party Liberal leh a dang eng emaw zat an tel a ni.
Lok Sabha 2019 inthlan thlirletna :
Kum 2019 Lok Sabha inthlanah khan BJP chu party mala seat la hnem ber niin seat 303 an la a, vote tla zawng zawnga aṭanga 37.36% zet an hmu pha a, hei hi 1989 inthlanpui hnua political party vote share neih san ber a ni.
BJP hian 2019-ah party malin sorkarna siam thei mah se, NDA hnuaia an thawhpui party dangte nen ṭangrual sorkar siamin, NDA hian seat 353 an nei a ni. Congress party chuan seat 52 la in, United Progressive Alliance (UPA)-a an thawhpuite nen seat 91 an nei. Congress hian Lok Sabha-a Leader of Opposition post chang tura seat neih ngai zat, seat awm zat aṭanga 10% pawh a nei pha lo a ni. NDA leh UPA-a tel lo party dangten seat 98 an nei ve bawk.
Lok Sabha 2024 inthlan result : BJP-in an inbeisei zat an pha lo
Kumin Lok Sabha inthlanah BJP chu party mala che ṭha ber ni chhunzawm leh mah se, an inbeisei leh chhut lawk dan erawh an pha lo. Exit poll hrang hranga an seat lak tur zata an chhut sak ang chu an hmu pha lo hle a ni. Mahse party mala an tlakhniam lai hian, NDA hnuaia an thawhpui party ṭhenkhatte an chet ṭhat avangin, central-ah NDA a sorkar leh thei dawn ta tho a ni.
BJP hian 2019 inthlanah party malin seat 303 zet a nei pha a, hetih lai hian nimina 2024 inthlan result chhiar mekah chuan seat 241-ah chauh hma a hruai pha thung. Hengah hian chak zui vek mah se, kum 2019-a a seat lak zat chu 62 zetin a pha dawn ta lo.
Prime minister Narendra Modi chu Uttar Pradesh-a Varanasi bialah a ṭum thumna atan a tling leh. PM hi tling tura rin sa a ni bawk a, rin lawk ang ngeiin hneh takin a tling leh a, mahse kum 2014 leh 2019 inthlan aiin a hnehna margin hi a tlem ta thung. Kum 2014 khan vote tla zat aṭangin 56.38% hmuin, a winning margin hi vote nuai 3.72 a ni a, 2019-ah a vote 63.6% hmuin, amah hnaih bertu nena an inthlauhna hi vote nuai 4.79 a tling bawk. Kumin inthlanah chuan amah hnaih bertu, Congress candidate Ajai Rai nena an inthlauhna hi vote nuai 1.4-ah a tla thla tawh thung.
Beisei aiin Congress an che ṭha
Eptu party lian ber, Congress chu hun eng emaw chen aṭangin an dinhmun a tlahniam nasa hle a, 2019 Lok Sabha inthlanah phei chuan House-a Leader of Opposition post pawh nei pha lo khawpin an che chhia a ni. Mahse tun ṭum inthlanah chuan mipuite beisei aiin an rawn che ṭha a, 2019-a seat 52 chauh an lak laiin, he chanchin buatsaih lai hian seat 90-ah hma an hruai mek a ni. Kum 2014 inthlanpui hnua an chet ṭhat ber ṭum an tawng. BJP auhla; Congress awm lohna India, Congress-mukh Bharat siam an tumna chu a hlawhchham chiang hle.
Congress hruaitu, Rahul Gandhi chuan kumin inthlanah hian Lok Sabha seat pahnih - Kerala-a Wayanad leh Uttar Pradesh-a Rae Bareli-ah a chuh a, bial pahnihah hian hneh taka thlan tlin ve ve a ni. Rael Bareli hi a nu, Sonia Gandhi dinna bial ṭhin a ni a, kum 2004 aṭang khan a bial him a ni. Mahse kumin inthlanah erawh chuh loin, Rajya Sabha lamah a insawn a, a fapa a ding ve thung a ni. Rahul Gandhi hian vote nuai 4 chuangin amah hnaih bertu, Uttar Pradesh minister, BJP candidate Dinesh Singh a hneh. Wayanad-ah pawh vote tla aṭanga 59.53% a hmu pha a, a khingpui Communist Party of India candidate, Annie Raja chu vote nuai 3.5 chuangin a hneh bawk.
Uttar Pradesh result-in mipui barakhaih
BJP ṭhatna leh sorkar mekna, Ram Temple saa thawm an neih len em em na, Uttar Pradesh-a Lok Sabha inthlan result-in mipui a barakhaih hle. He state hian Lok Sabha seat 80 zet an nei a, 2019 inthlanah khan BJP kaihhruai NDA-in seat 62 an la pha a ni. BSP leh Samajwadi Party chuan seat 10 leh 5 an la ve bawk.
Ram Temple sak chuan an beisei angin BJP dinhmun a siamṭhat phah ta lo niin a lang a, kumin inthlanah Congress kaihhruai INDIA bloc chu UP-ah rin phak bakin an rawn che ṭha ta thung a ni. Vote chhiar mekah INDIA hian seat 43-ah hma an hruai a, NDA-in seat 34-ah hma an hruai thung. INDIA bloc hma hruaina zinga seat 37 hi Samajwadi Party candidate-te niin, anni hian 2019 inthlanpuiah khan seat 5 chauh an la a ni.
Congress candidate KL Sharma chuan Amethi bialah union minister Smirti Irani lakah vote nuai khat chuangin hma a hruai a, Irani hian a lehpelh theih a rinawm tawh lo. Ram Temple awmna, Faizabad bialah pawh INDIA bloc aṭangin, Samajwadi Party candidate chuan a hma a hruai bawk a ni.
Delhi-ah AAP thawm a ring lo
Delhi-ah rorellai, Aam Aadmi Party (AAP) thawm a ring lo hle a, Lok Sabha seat awm zat seat 7-ah BJP in hma an hruai vek. Chanchin buatsaih laia vote chhiar tawh chinah, BJP hian vote tla aṭanga 54% hmuin, AAP-in 26% leh Congress-in 17% an hmu.
Lok Sabha inthlan campaign hun tawhah AAP hotu, Delhi chief minister Arvind Kejriwal man a nih leh, ṭum eng emaw zat a dil hnua interim bail-a chhuah phalsak a ni chauh chuan AAP campaign-na thlengin a nghawng pha a, hetih lai hian BJP chuan Delhi excise policy chu AAP sorkar beihna remchang takah a lo hmang bawk. Hei hian AAP dinhmun pawh a pawt hniam nia ngaih a ni.
AAP hi inthlan dawn hnaiha an party hruaitute man leh buaina neih chuan a tibuai a, hei hian an result thlengin a nghawng nia ngaih a ni. Lok Sabha seat 22-ah chuhin, Delhi, Gujarat, Goa, Haryana leh Chandigarh-ahte INDIA bloc hnuaia seat insem angin an kal a, Delhi-a hian AAP hian seat 4 leh Congress-in seat 3-ah an chuh a ni. Punjab leh Assam-ah erawh party mal angin an chuh thung. Mahse an seat chuhna zinga pali - Punjab-ah vek chauh hma an hruai thei.
Hindi heartland-ah BJP an tlahniam
Hindi heartland state 10 - Uttar Pradesh, Uttarakhand, Bihar, Jharkhand, Chhattisgarh, Madhya Pradesh, Delhi, Haryana, Himachal Pradesh leh Rajasthan-ah BJP dinhmun a tlahniam.
Kum 2019 inthlanpuiah khan heng state 10-a Lok Sabha seat awm, seat 225 zinga 176-ah BJP an chak a, kumin inthlanah erawh hian seat 127-ah chauh hma an hruai tawh a ni. Uttar Pradesh bakah, Harayana, Rajasthan, Bihar leh Jharkhand-ah an tlahniam hle a ni. Hindi heartland lamah an tlakhniam lai hian, Odisha-ah erawh an che ṭha hle a, Lok Sabha seat 21 awmah 19 zetah hma an hruai. Kum 2019-ah khan BJP hian Odisha-ah hian seat 8 chauh an la pha a ni. 2019-a seat 12 la tu, BJD chuan seat khatah chauh hma a hruai ve tawh thung.
Omar Abdullah leh Mehbooba Mufti-te an chak zo lo
Jammu and Kashmir chief minister hlui, National Conference (NC) vice president Omar Abdullah chu North Kashmir-a Baramulla Lok Sabha constituency-ah chuhin, independent candidate Sheik Rashid, Engineer Rashid tia hriat lar chu a hneh zo lo.
Omar Abdullah chuan a chak loh chu a pawm thu a sawi a, hemi rual hian a chak avanga Rashid chu jail aṭanga chhuah tir a nih nghal mai loh a beisei thu a sawi bawk. Rashid hi Unlawful Activities (Prevention) Act hnuaia thubuai nei lai niin, Tihar Jail-ah a tang mek a, campaign lai pawhin a fapa, university zirlai Abrar Rashid chu a pa tan hian a campaign a ni.
J&K chief minister hlui dang, People's Democratic Party (PDP) president Mehbooba Mufti-i pawhin Anantnag-Rajouri Lok Sabha constituency-ah National Conference candidate Mian Altaf a hneh lo. Mufti pawh hian a chak loh a pawm thu X-ah ziakin, Mian a lawmpui thu a sawi bawk.
Indore-ah NOTA-ah vote nuai 2 chuang a tla
Madhya Pradesh-a Indore constituency-ah NOTA chu vote hmu hnem ber dawttu niin, vote nuai 2 chuang a hmu.
Indore-ah hian May 13 khan vote thlak a ni a, mahse vote thlak hma lawk, April 29 khan Congress party candidate, Akshay Kanti Bam chu inhnukdawkin BJP miniser Kailsah Vijayvargiya-te district collector office-ah kalin a nomination hi a hnukdawk a, BJP a zawm zui nghal bawk. Hei vang hian INDIA alliance chuan candidate an nei ta lo a ni. Bam chet dan hian Congress party mi leh sate rilru a ti na hle a, party hruaitute chuan inthlanah hian vote thlak ngei tur leh, NOTA-a vote turin an mite an hrilh a ni. Nimin chawhnu dar 2 thleng khan NOTA-a vote tla hi nuai 1.6 a tling tawh a, vote nuai 7.74 hmu tu BJP candidate Shankar Lalwani dawttu ah a awm a ni.
Hmarchhak state-ah NDA in hma an hruai
Hmarchhak state pariat - Assam, Sikkim, Arunachal Pradesh, Meghalaya, Tripoura, Manipur, Nagaland leh Mizoram-ah Lok Sabha seat 25 a awm a, Assam chu seat tamna ber niin seat 14 a awm.
BJP kaihhruai NDA chuan hmarchhak bialah hma an hruai. Assam-a seat 9-ah BJP chuan hma an hruai a, Congress party-in seat 3-ah hma an hruai ve bawk. United People’s Party Liberal leh Asom Gana Parishad chuan seat khat ve ve ah hma an hruai. Arunachal Pradesh-a Lok Sabha seat pahnih awmah BJP in hma an hruai ve ve bawk.
Hetih lai hian Congress party pawhin hmarchhak bialah inthlan hmasa aiin hma an sawn a; BJP sorkarna, Manipur-a Lok Sabha seat pahnih awmah Congress candidate-ten hma an hruai ve ve. Meghalaya-a Tura bialah Congress candidae Saleng A. Sangma chuan rorellai, NPP candidate Agatha K. Sangma a hneh. Shillong bialah regional party Voice of the People party chuan hma an hruai bawk. Mizoram-ah sorkar lai, Zoram People's Movement (ZPM) candidate a chak a, Nagaland-ah Congress candidate S. Supongmeren Jamir chuan hma a hruai a, amah hnaih bertu nena an inthlauhna hi vote 50,000 chuang zet a nih tawh avangin lehpelh theih a ni tawh lo.
Sikkim-ah rorellai, Sikkim Krantikari Morcha (SKM) candidate, MP ni lai Indra Hang Subba chu thlan nawn leh a ni a, Lok Sabha seat pahnih awmna Tripura-ah BJP an chak ve ve bawk a ni.