June 8-ah Prime Minister atan Modi la lut dawn; NDA term thumnaah TDP leh JD(U) an pawimawh

Lok Sabha 2024 inthlanpui neih zawh takah Bharatiya Janata Party (BJP) kaih hruai National Democratic Alliance (NDA) chu Lok Sabha seat 543 aṭangin seat 294-an la a, sorkarna an siam leh thei dawn.

Sorkar thar lak luh a nih theihna atan prime minister Narendra Modi leh a council of minister-te chuan banna an theh lut a, President Droupadi Mumru pawhin an banna theh luh hi a pawmsak tawh bawk. Hemi rual hian sorkar thar lak luh a nih hma chuan mawhphurhna lo la chhunzawm turin a ti a ni.

June 8 hian a term thumna atan Narendra Modi chu India prime minister atan lakluh a ni dawn nia sawi a ni. Hemi rual hian a cabinet member turte pawh lak luh an nih nghal rin a ni bawk. NDA hian sorkarna an siam leh thei a nih chuan, Narendra Modi hi Jawaharlal Nehru hnuah Prime Minister term thum chelh leh thei hmasa ber a ni ang.

BJP hian seat 240 a la a, party mala sorkarna siamna daih a neih tak loh avangin, NDA hnuaia a thawhpui party pahnih, Andhra Pradesh-a seat 16 la tu, Chandrababu Naidu kaihhruai Telugu Desam Party (TDP) leh Bihar-a seat 12 la tu, Nitish Kumar kaihhruai Janata Dal United te chu NDA term thumna sorkar siamna kawngah an pawimawh ta hle. Sorkar siam tur hian Lok Sabha-a hian seat 272 neih phak a ngai a ni.

Nimin tlai khan New Delhi-ah NDA party meeting neih a ni a, he hunah Naidu leh Kumar te pawh hi an tel. TDP leh JD(U) te dinhmun a pawimawh tak em avangin thil phut hrang hrang an nei nia sawi thawmte a awm a, eptu party ṭangrual INDIA nen an inbia nia thu thangte awm mah se, party hruaitu pahnihte hian NDA-ah an tel zel dawn tih an sawi. Mahse party pahnihte hi an ṭan lam thlak reng an nih avangin, ngaihven zui an hlawh hle.

BJP hi sorkar thar siam tura a thawhpui dangte chunga a innghah len tak vangin, NDA-a tel party dangte pawhin phut an rawn nei chho mek. TDP hian Speaker post an phut nia sawi a ni a, mahse sawi chian a la ni lo thung. JD(U) hian cabinet post pathum an phut a, Eknath Shinde kaihhruai Shiv Sena chuan cabinet post pakhat leh Minister of State post pahnih, Lok Janshakti Party (Ram Vilas) in cabinet post pakhat leh state minister post pakhat, HAM (S) hotu Jitam Ram Majhi-a'n cabinet post pakhat an phut bawk.

TDP leh JD(U) dinhmun :

TDP hian kum 1996 khan NDA hi a zawm a, mahse kum 2018-ah a chhuahsan leh. 2019 inthlanpui neih dawn khan Congress party kaihhruai United Progressive Alliance (UPA) an zawm leh a, kumin February thla khan NDA lamah an ṭang leh thung.

Nitish Kumar kaihhruaina hnuaiah JD(U) hi NDA-ah awm rengin, Atal Bihari Vajpayee prime minister-na hnuaiah khan Kumar hi union railway minister pawh a lo ni tawh a ni. Mahse prime minister candidate atana Narendra Modi dah chho a ni chu Kumar hian duh loin, kum 2013 khan NDA hi a chhuahsan a ni. Bihar-ah Congress, RJD, JD(U) leh Left party-te nen ṭangrual sorkar, Mahagathbandhan an din a, mahse kum 2017 khan Nitish hian RJD a thawhpui theih loh avangin a chhuahsan. Kum 2022-ah Mahagathbandhan-ah hian a kir leh a, mahse kumin inthlanpui neih hmain NDA hi a zawm leh a ni. Hei vang hian NDA hian a beisei ang chanvo ṭha a pek loh chuan, eptu ṭangrual pawl INDIA pawh a thawhpui leh mai duh dawna rinna a lian hle.

Mamata-i'n Modi thlawp lo turin Nitish leh Naidu a ngen

West Bengal chief minister, Trinamool Congress party hruaitu Mamata Banerjee chuan prime minister Narendra Modi chu thuneihna chantir chi a ni tawh lo tiin, NDA-a tel party-te chu Modi kaihhruai sorkar chu thlawp tawh lo turin a ngen.

Banerjee chuan BJP leh Rashtriya Swayamsevak Sangh-ah mi ṭha tak tak awm an awm a, chung mite chu an party-ah danglama thlen tura an beih let a hun tawh a ni, a ti. 'INDIA team hi ka pui zel dawn a, Modi hi paih chhuah a nih a, INDIA zawkin ro an rel theihna turin theihawp ka chhuah dawn. INDIA hi a sorkar chuan mipuite leh kan ram hi a him dawn a ni," a ti.

INDIA bloc-in Delhi-ah meeting nei

Eptu ṭangrual pawl, Indian National Developmental Inclusive Alliance (INDIA) hruaitute chuan nizan khan New Delhi-a Congress party president Mallikarjun Kharge chenna inah meeting an nei.

INDIA hruaitute hian inthlan result-te thlir letin, hma an lak chhoh dan turte an sawiho dawn a, sorkarna an siam theihna atana Janata Dal (United) chief Nitish Kumar leh Telugu Desam Party (TDP) hotu Chandrababu Naidu biak leh biak loh chungchangte an relho dawn nia sawi a ni. Meeting hi Rahul Gandhi leh Sonia Gandhi-te pawhin an telpui ang.

Meeting hmaa chanchin thar lakhawmtute a kawmnaah, Maharashtra chief minister hlui leh Shiv Sena (UBT) chief, Uddhav Thackeray chuan meeting-ah hian bloc prime minister candidate tur pawh an rel dawn tih sawiin, ṭangrual pawl an dinna chhan ber chu India rama mi pakhat rorelna tihtawp a, ram danpui Constitution tun dinna tur atan a ni tih a sawi.

Party-te vote hmuh dan

Exit poll hrang hrangte chhut dan rawn paih thlain, tun ṭum inthlanah Congress kaihhruai INDIA bloc chu rin phak bakin an rawn che ṭha a, rorellai BJP kaihhruai NDA nen an inbei tawk hle. Congress pawh party mal angin a rawn che ṭha hle a, kum 2014 hnua inthlanpuia a chet ṭhat ber ṭum niin seat 99 a nei pha.

Election Commission of India-in party hrang hrangte vote share a tarlanah, BJP hian vote tla aṭangin 36.76% hmuin hma a la hruai fal tho a, Congress-in 21.46% hmuin a dawt. Vote share nei sang zual panga zingah Samajwadi Party (4.63%), All India Trinamool Congress (4.33%) leh Bahujan Samaj Party (2.06%) te an tel.

Inhnehna sang zual 5-te

Kumin Lok Sabha inthlanpui neiha candidate inhnehna san berna chu Madhya Pradesh-a Indore constituency-ah a ni a, BJP candidate Shankar Lalwani chu chakin, vote nuai 11.75 a hmu a, a hnaih bertu NOTA chuan vote nuai 2.19 a hmu.

Indore-ah hian inthlan neih hma lawkin Congress candidate Akshay Bam chu a inhnukdawk a, BJP a zawm zui nghal a ni. Hei vang hian INDIA bloc chuan candidate an nei ta lo a, Congress chuan an party mi leh sate chu NOTA-ah vote turin an sawm a ni.

Assam-a Dhubri constituency-ah Congress candidate Rakibul Hassan chuan amah hnaih bertu, AIUDF MP nilai Badruddin Ajmal chu vote nuai 10 chuangin a hneh bawk. Inhnehna sang zual pathumna chu Madhya Pradesh-a Vidisha bialah niin, chief minister hlui Shivraj Singh Chouhan chu thlan tlin a ni a, a hnaih bertu Congress candidate nen an vote hmuh zat inthlauhna chu nuai 8.21 a tling. Gujarat-ah BJP state president C.R. Patil chuan vote nuai 7.73 in a khingpui a hneh a, union home minister Amit Shah pawhin Gandhinagar-ah amah hnaih bertu chu vote nuai 7.45 in a hneh bawk.

Hmarchhakah BJP-in MP 13 leh Congress-in 7 nei

Hmarchhak state hrang hrangah Lok Sabha seat 25 awm aṭangin, BJP chuan seat 13 an la a, Congress party-in seat 7 an la ve bawk. BJP chakna zinga seat 9 hi Assam state-a mi niin, Arunachal Pradesh leh Tripura-a seat hnih an la ve ve bawk.

Congress party pawh hmarchhak bialah an rawn che ṭha leh tawh a, MP pasarih an nei ta. Assam-a seat pathum, Manipur-a seat pahnih, Meghalaya-a Tura bial leh Nagaland-ahte Congress hi an chak a ni.

Hmarchhak bialah hian BJP thawhpui, National People's Party (NPP) leh Nationalist Democratic Progressive Party (NDPP) chuan seat an la ve ta lo a, hetih lai hian NDA hnuaia an thawhpui dang, United People's Party Liberal (UPPL), Asom Gana Parishad (AGP) leh Sikkim Krantikari Morcha (SKM)-te chuan seat khat ṭheuh an la thung. BJP candidate, union minister Sarbananda Sonowal chu Dibrugah constituency-ah a tling.

Kum 2019 Lok Sabha inthlanah khan hmarchhak state pariat aṭang hian BJP chuan seat 14 lain, Congress-in seat thum an la. A bak chu state party leh independent candidate-ten an la a ni.