JD(U)-in Agnipath scheme en nawn an phut

Central-ah a term thumna atan BJP kaihhruai National Democratic Alliance (NDA) chuan sorkarna a siam leh dawn a, mahse term hmasa pahnih angin BJP hian member an ngah tawk loh avangin a thawhpui party-te chungah a innghat lian hle. NDA-a party dangte pawh kum dang aiin an huai ngam a, prime minister Narendra Modi kaihhruai sorkar laipui tan pawh a harsa chho hle dawn a ni.

BJP-in NDA hnuaia a thawhpui, sorkar an siamna tura pawimawh tak, Nitish Kumar kaihhruai Janata Dal United chuan sorkar laipuiin sipaia ṭang tur lakna thar a siam, Agnipath scheme chu ṭha an tih loh thu an sawi chhuak nghal. JDU thupuangtu, KC Tyagi chuan, 'He scheme sawiselna hi a awm fo a, ennawn turin kan ngen dawn a ni," a ti.

Kum 2022 aṭanga kalpui, Agnipath scheme hmang hian ṭhalai, kum 17.5 - 21 inkar chu sipaiah kum li ṭang tura lak an ni a, he scheme hmanga lakte hi Agniveer tih an ni. Agniveer zinga 25% chauh hi sipaiah an ṭang chhunzawm dawn a, a bak zawng chu kum li hnuah an chawlh leh nghal ang. He scheme hian sawisel pawh a hlawh hle a, ram chhung hmun hrang hrangah sipai ṭan tuma inbuatsaihten short-term service plan an duh lohna pawh an lantir. Eptu party hrang hrang pawhin an duh loh thu an sawi bawk.

KC Tyagi chuan Uniform Civil Code (UCC) chu JD(U) chuan a dodal hran lo a, mahse thutlukna siam a nih hmain stakeholder zawng zawng ngaihdan lak phawt an duh tih a sawi. 'One Nation, one poll' chu an thlawp niin an sawi bawk a ni. Inthlan dawna an campaign-naah khan union home minister Amit Shah chuan Modi-a sorkar term thumnaah UCC hi ram pumah hman a ni ang tiin a lo sawi tawh a ni.