SC-in Delhi tan tui pe chhuak turin HP hriattir

Delhi khawpuiin tui in tura harsatna a tawh mek chhawk zangkhaina turin, Supreme Court chuan nimin khan Himachal Pradesh hnenah tui, cusecs 137 chu Haryana-a Hathnikund barrage kaltlanga Delhi tana pe chhuak turin a hriattir.

Supreme Court chuan tui a pek chhuah hma hian Haryana chu hriattir hmasa turin a ti bawk. Tui hi vawiin hian pe chhuak hman turin a ti a ni.

Hetih lai hian Haryana chuan court thupek hi a sawisel thung a, Himachal Pradesh hian tui pek tur cusecs 137 a nei lo a, Haryana ngei pawhin tui lamah harsatna a tawk mek tih an sawi. Mahse Himachal Pradesh hian Delhi tana tui pek tur hi a nei tih a sawi ve thung a ni.

Khaw lum nasa tak karah Delhi khawpui hian tui in tur indaihlohna a tawk mek a, khawpui chhung hmun tam takin harsatna an tawh phah a ni. Tanker-a tui sem dawhtute pawh an intlar thui thei hle. Tui lama harsatna an tawh mek hi political party-te pawhin inbeihna remchangah an hmang zui bawk. Delhi sorkar chuan Supreme Court leh sorkar laipuiah ngenna thlenin, tui lama harsatna an tawh mek chhawk zangkhaina turin Haryana, Uttar Pradesh leh Himachal Pradesh aṭanga tui supply belh tir turin a ngen a ni.