AAP MLA-ten emergency meeting an ko

Delhi-a rorellai, Aam Aadmi Party (AAP) MLA-te chuan nimin khan chief minister Arvind Kejriwal-a chenna inah emergency meeting an ko.

Meeting-ah hian an kalphung thlak dan turte an sawiho dawn nia sawi a ni a, hei bakah hian CM Kejriwal chu jail-a a la tan avangin CM thar tur pawh a sawi ho dawn nia sawi a ni bawk. Hei hi assembly inthlan an hnaih tawh vang a ni a, nakum January thla tawp lamah chuan Delhi assembly inthlan hi neih a ni ang.

Tun ṭum Lok Sabha inthlanah khan Delhi-ah hian AAP leh Congress party an thawk dun a, mahse seat khat mah la loin, Lok Sabha seat pasarih awm chu BJP-in an hui vek a ni.

AAP chuan Delhi bakah Punjab, Haryana, Gujarat leh Assam-ahte Lok Sabha inthlan hi an party hmingin an chuh a, mahse AAP sorkar mekna Punjab-ah seat thum lain, a bakah an chak lo vek a ni.

Party hruaitu, Sandeep Pathak chuan an beisei ang seat hmu pha lo mah se, kum 2019 inthlanpui aiin kumin inthlana an vote share erawh a sang tawh hle tih a sawi. Kum 2019-ah Punjab-a AAP vote share chu 7% a nih laiin, kuminah chuan 26% a kai a ni. Lok Sabha inthlan leh assembly inthlan atana inbuatsaih dan chu a dang hlak a ni tih pawh an hrechiang chho tih sawiin, AAP chuan nasa zawkin ṭan a la chho dawn a ni, a ti.

Inthlan dawna AAP hotu lu ber Arvind Kejriwal man a nih chungchang pawh sawi chhuakin, Pathak chuan, "BJP chuan kan hruaitu eng emaw zat jail-ah a dah a, kan hotu lu ber Arvind Kejriwal pawh jail-ah a khung a ni. Kan volunteer-te vauin, kan MLA-te sum hmanga lei chhuah an tum bawk. Mahse hei hian AAP chu inpumkhatna leh lungrualna ṭha zawk min siam a ni," tiin a sawi.