PM Modi lak luhnaah Asia ram hruaitute sawm

Lok Sabha inthlanpui neih zawh takah BJP kaihhruai National Democratic Alliance (NDA) chu thlan tlin an nih leh a, a term thumna atan NDA sorkar a ding leh dawn a ni. Narendra Modi pawh Inrinni hian India Prime Minister thar atan rinawmna thu tiam tira lak luh a ni dawn a, a zawna PM term thum a chelhna tur a ni ang.

Prime Minister thar lak luhna turah hian sorkar laipuiin 'Neigbourhood First' policy a kalpui angin Asian ram hruaitute sawm an ni a, eng emaw zatin an rawn telpui dawn.

Bangladesh leh Sri Lanka ram hruaitute chuan Modi-a lak luh inkhawm hi an telpui dawn tih an sawichiang tawh. Sawmna hi Nepal, Bhutan leh Mauritius ram hruaitute pawh thawn niin, anni pawhin an rawn tihchian thuai rin a ni.

Kum 2014-a Modi lak luh inkhawmah hian SAARC (South Asian Association for Regional Cooperation) ram hruaituten an rawn telpui a, 2019-ah khan BIMSTEC (Bay of Bengal Initiative for Multi-Sectoral Technical and Economic Cooperation) hruaituten an rawn telpui bawk.