Delhi Assembly inthlanah AAP-in party mala chuh tum

Delhi-a rorellai, Aam Aadmi Party (AAP) chuan nakkuma Delhi assembly inthlan neih turah an party chuan INDIA bloc anga chuh loin, party mala an chuh tur thu an sawi.

Kumin Lok Sabha inthlanpuiah khan Delhi-ah AAP hian INDIA bloc hnuaia chuhin, Congress party nen Lok Sabha seat pasarih awm chu an insem a, mahse BJP in an la fai vek a ni.

Delhi-a assembly constituency 70-ah hian nakkum February thla velah inthlan hi buatsaih a nih rin a ni. AAP hruaitu, Gopal Rai chuan, "INDIA ṭangrual pawl hi Lok Sabha inthlan tura atan siam a ni tih a tirah pawh tihchian vek a ni. Hei vang hian ṭangrual pawl hming hian Lok Sabha inthlan pawh kan chuh a ni. Mahse Delhi Vidhan Sabha election atan chuan ṭangrual pawl a awm hran tawh lo," a ti.

INDIA a tel, Trinamool Congress (TMC) hruaitu leh West Bengal chief minister, Mamata Banerjee pawhin state level-ah chuan ṭangrual pawl siam a duh lo a, TMC chu Lok Sabha inthlan atan chauh INDIA-ah a tel tih a lo sawi tawh bawk.

Anni ang bawkin Communist Party of India (CPI (M)) pawhin state assembly atan chuan INDIA anga thawh ho an duh lo tih an sawi a ni.