Congress-in MP 100 a nei thei dawn

Lok Sabha inthlan neih zawh takah Congress party chuan MP 99 a nei a, mahse an party aṭanga hel, independent candidate-a Maharashtra aṭang thlan tlin, Vishal Patil chuan Congress hi a thlawp dawn tih a sawi leh tak avangin MP 100 a nei tling thei dawn ta.

Maharashtra chief minister hlui, Vasantdada Patil tupa, Vishal Patil hi kumin inthlanah hian Sangli parliamentary seat-ah Maharashtra Vikas Aghadi (MVA) tangrual pawlin Shiv Sena-UBT aṭanga candidate an dah avanga lungawi loin, independent-in a chuh zui a, BJP candidate Sanjaykaka Patil hnehin thlan tlin a ni zui ta a ni.

Thlan tlin a nih hnuah, Ningani khan Patil hian Congress party president Mallikarjun Kharg bakah Sonia Gandhi leh Rahul Gandhi-te a hmu a, Congress party a thlawpna lehkha a pe a ni. Congress a thlawpna a thehluh hi Lok Sabha Secretariat-in a pawmsak chuan, Vishal Patil nen hian Lok Sabha-a Congress party hian MP 100 a nei thei dawn ta niin party hruaitute chuan an sawi.