Prime Minister atan Narendra Modi la lut

Narendra Modi chu nizan khan President Droupadi Murmu chuan India ram prime minister thar atan rinawmna thu tiam tirin a la lut. A rual hian a cabinet member ṭhenkhat pawh lak luh an ni ve nghal bawk.

Congress hruaitu, Jawaharlal Nehru hnuah Narendra Modi hi India Prime Minister term thum chelh leh thei hmasa ber a ni. Nehru hi kum 1952, 1957 leh 1962 inthlanpuiah te chakin, prime minister dinhmun hi term thum a chelh a ni.

Rashtrapati Bhavan-a lak luh inkhawm neihah hian venhimna lam pawh an uluk hle a, venhimna hi thuah thuma siam niin a chhehvelah leh Delhi khawpui chhung hmun pawimawhahte Delhi Police Swat leh NSG te an duty reng bawk. Delhi chu no-fly zone atan puan niin, aeriel platform hrang hrang - drone, para glider, remotely piloted aircraft leh hot air balloon te khap a ni.

Prime Minister chenna inah Inrinni khan Modi hoin darkar 11 zet meeting an nei a, a cabinet thar turte hi an ruat nghal a ni. Lak luh inkhawm zawhah BJP national chief JP Nadda chuan NDA MP thlan tharte chu zanriah a buatsaih sak nghal bawk.

BJP kaihhruai National Democratic Alliance (NDA) sorkar term thumnaah hian BJP chuan sorkar hmasa pahnih angin member ngah tawk tawh lo mah se, portfolio pawimawh - home, defence, finance leh external affairs te erawh chu an la chang chhunzawm a ni.

PM thar lak luh inkhawm hi ram dang hruaitute eng emaw zatin an rawn telpui a, an zingah hian Sri Lanka President Ranil Wickremesinghe, Maldives President Mohamed Muizzu, Bangladesh Prime Minister Sheikh Hasina, Mauritius PM Pravind Kumar Jugnauth, Nepal Prime Minister Pushpa Kamal Dahal 'Prachanda', Bhutan PM Tshering Tobgay leh Seychelles Vice-President Ahmed Afif te an tel.

Prime Minister-in engzat nge a hlawh?

Khawvela democracy ram lian ber, India ram hruaitu, prime minister thla khat hlawh hi Rs nuai 1.66 a ni a, hei hian basic pay Rs 50,000 a huam.

Expense allowance Rs 3,000, parliamentary allowance Rs 45,000 bakh daily allowance Rs 2,000 te a nei bawk. Free official house neiin, venhim hna hi Sepcial Protection Group (SPG) in an thawk. A zin leh tei velna atan official car leh thlawhtheihna pek a ni a; a zinna, thlenna leh ei leh in mante sorkarin a tum vek a ni. Prime Minister aṭanga an chawlh hnuah kum nga chhung SPG in an la veng zui a, awmna hmun bakah electricity leh tui pawh a thlawn vekin an la dawng a ni.