Modi 3.0-ah minister 72 an awm

Narendra Modi chu Pathianni zan khan India ram prime minister thar atan rinawmna thu tiam tira lak luh a ni a, a rual hian a kaihhruai ṭangrual sorkar thara a minister tur mi 71 lak luh an ni nghal bawk.

Bharatiya Janata Party (BJP) kaihhruai National Democratic Alliance (NDA) term thumna atana minister lak luh zinga 30 chu cabinet minister niin, minister of state (independent charge) 5, leh minister of state 36 an ni. Minister atana lak luh zingah hian NDA hnuaia BJP thawhpui party dang aṭangin mi 11 an tel. NDA-in sorkarna a siam leh theihna tura pawimawh, Telugu Desam Party (TDP) leh Janata Dal (United) chuan cabinet post pakhat ve ve an chang a ni. Anni bakah cabinet post changtu zingah hian Janata Dal (Secular), Hindustani Awam Morchan (Secular) leh Lok Janshakti Party pawh an tel a ni.

Union Council of Minister-ah hian 81 chin awm thei mah se NDA term hmasa pahnih aiin tun ṭumah pawh hian an tam zawk tawh a ni. Kum 2019-a prime minister atana Narendra Modi lak luh a nih khan a rualin a minister tur mi 57 la luh tel ve an ni a, kum 2014-ah khan PM leh minister 46 lak luh an ni bawk.

Prime minister Narendra Modi-a'n a cabinet minister atan a ruat, Pathianni zana lak luh mi 31 zingah cabinet rank la chelh ngai lo, mi thar pakua an tel. Hetih lai hian term hmasa lama minister dinhmun lo cheh mi 37-te chu paih an ni a, an zingah hian cabinet rank pasarih telin, Smriti Irani, Anurag Thakur leh Narayan Rane-te chu chhawk zingah an tel.

Nimin tlai khan PM Modi kaihhruaiin NDA sorkar thara cabinet meeting hmasa ber neih a ni a, he hunah hian minister-te chanpual hrang hrang pawh an tihfel nghal rin a ni.

Hmeichhe minister 7 an awm

Pathiannia council of minister lak luh zingah hian hmeichhia pasarih an tel a, an zinga pahnih chu cabinet rank an ni. Cabinet minister atana lak luhte hi term hmasaa finance minister, Nirmala Sitharaman bakah term hmasaa junior minister for education, Annpurna Devi te an ni. Minister atana lak luh dangte chu Anupriya Patel, Raksha Khadse, Savitri Thakur, Shobha Karandlaje leh Nimuben Bambhaniya te an ni. NDA term hnihna sorkarah khan hmeichhe minister hi 10 an awm a ni. A term hmasa ber, kum 2014-ah pariat an awm bawk.

Kumin Lok Sabha inthlanpuia thlan tlin zingah khan hmeichhia 74 an awm a, kum 2019 inthlanah khan hmeichhe 78 thlan tlin an ni.

Minister tharin ban leh nghal a duh

Pathiannia Modi 3.0 sorkar thara minister of state atana lak luh zinga mi, Kerala BJP MP Suresh Gopi chuan union minister a nihna aṭanga ban a duh thu a sawi leh nghal.

Actor-turned politician, Gopi chuan union minister ni lo a, MP anga awm zui mai a duh thu sawiin, film chan turte pawh a lo sign hman tawh a, hengte hi a chan chhunzawm ngei ngei a ngai tih a sawi. "Ka tum ber chu MP anga hna thawh a ni a, a bak engmah ka dil lo. A hma pawhin he post hi ka mamawh lo tih pawh ka sawi tawh a ni. Hei vang hian min awl tir leh thuai ka ring. Thrissur mipuite pawhin buaina an nei lo. MP angin an tan ṭha takin ka thawk thei ang tih an hria a ni," a ti.

PM-in 'PM Kisan Nidhi' scheme fund pekna tur sign

Prime Minister thar atana lak luh a nih tuk, nimin khan Narendra Modi chuan office luah nghalin, PM Kishan Nidhi scheme fund 17th installment pek chhuahna tur a sign nghal.

PM Modi chuan, "Sorkarin Kisan Kalyan hi a ngai pawimawh a, hei vang hian loneitute kaihhnawih thil buaipui hmasak ber hi a inhmeh hle a ni," a ti. A kaihhruai sorkar chuan loneitute leh agricultur sector tan nasa zawkin hna a thawk dawn tih a sawi bawk. PM Kishan Nidhi scheme fund pek chhuah thar tur hi loneitu vaibelchhe 9.3 ten an chhawr dawn a, Rs vbc 20,000 sem a ni ang.

Pradhan Mantri Kisan Samman Nidhi (PM-KISAN) hi kum 2019-a siam kha niin, he scheme hnuaiah hian loneitu thlan chhuahte chu kumtin ṭanpuina, Rs 6,000 ṭheuh pek an ni ṭhin. He sum hi thawh thuma pek niin, thla li danah Rs 2,000 zelin a dawngtu tur bank account-ah thunsak an ni ṭhin.