J&K-a bus beihnaah mi 9 an thi

Jammu and Kashmir-a Reasi hmunah biakzina kalte phurtu bus chu Pathianni zan khan firfiakten an kap a, bus hi chesualin kawrah a tla zui a, mi pakua an thi a, hliam tuar 33 an awm bawk.

Bus-ah hian Shiv Khori cave temple tlawha kalte an chuang a, an kir lehna lamah beih hi an tawk a ni. Thi zingah hian bus driver leh conductor pawh an tel.

Pakistan thlawp pawl, The Resistance Front chuan bus beitu an nih thu nimin khan an sawi. Thuchhuah an siamah, TRF chuan Jammu and Kashmir-a khualzinte chu beih an la ni zel dawn tih sawiin, Reasi-a inbeihna thleng pawh chu bul an ṭanna chauh tih an sawi.

Pawikhawihtute zawn hna hi ngawrh taka thawh chhunzawm zel a ni a, Home Ministry chuan Reasi-a firfiakte pawikhawihna thlen hi National Investigation Agency (NIA) in a chhui zui dawn tih a sawi bawk.

The Resistance Front hi kum 2019-a sorkar laipuiin Jammu and Kashmir special status pekna, Article 370 a ṭhiah hnua ding an ni a, kum 2023 khan sorkar laipui chuan firfiak pawlah a puang a ni.