Supreme Court-in NEET ordinance a dang duh lo

Supreme Court chuan ram pum huapa medical common entrance, National Eligibility Entrance Test (NEET) buatsaih tur kum khat atana tihkhawtlai chungchanga petition thehluh chu a hnawl.

President Pranab Mukherjee chuan sorkar laipuiin NEET tihkhawtlaina tura ordinance a siam chu a pawmpui tawh a, state board hrang hrangte chu kumin atan NEET hi an hman a ngai dawn ta rih lo a ni. Mahse he thupek tih-chhuah chungchangah Anand Rai chuan Supreme Court-ah petition thehlutin, Supreme Court-in NEET hi kumin academic year aṭanga hman ṭan tura a lo tih tawh a ni, a ti.

SC hian NEET hi hmang ṭan turin thupek lo siam tawh mah se, state hrang hrangte syllabus inang lo avang leh tualchhung lama harsatna hrang hrang awm thei avangin kaltlangpui lo turin na takin an nawr a, hemi hnuah kum khat atan sorkar laipui chuan a tihkhawtlaisak ta a ni.

Court chuan petition thehluh hi ngaihtuah chi a ni rih lo niin a sawi. NEET ordinance chu lo dan leh a nih chuan zirlaite rilru a tibuai tawh mai mai zawk dawn niin a sawi a, hei vang hian zirlaiten ṭha taka exam an hmachhawn theina turin buaina siam belh chu a chi loh niin a sawi. Nipui chawlhah ngaihtuah a tum zawk tih a sawi ν