Pakistan ISI-in Mansour an veng

US sipaiten kar kalta Inrinni-a Balochistan biala beihpui an thlaknaa an kahhlum tak, Taliban hruaitu hlui Mullah Akhtar Mansour chu Pakistan intelligence agency, Inter Services Intelligence (ISI) in a lo venghim ṭhin tih hriatchhuah a ni.

Official hrang hrang leh a thawhpui ṭhinte an kawmna aṭanga hriat danin Mansour hi mi hausa tak a ni a, Dubai leh Pakistan-ah in pawh a nei a ni. Pakistan-a Quetta khawpuia a in chu ISI hian an ven sak nia sawi a ni bawk.

Afghan intelligence offi-cial-te chuan Mansour hian Balochistan-a thah a nih hma hian Pakistan ramah a lutin a chhuak fo tih an sawi. Geo TV report chaun Karachi-a Jinnah International Airport aṭangin Mansour hi ṭum kua zet Dubai panin a zinchhuak a, Bahrain ram pawh ṭum khat a tlawh bawk.

Pakistan news channel chuan March 12, 2006 khan Mansour hi Dubai aṭangin Karachi-ah chartered plane hmangin a lut a, hemi kum vek August 23 hian Dubai-ah a kir leh niin a tarlang. Kum 2007 khan Pakistan leh Dubai hi ṭum khat a tlawh a, 2008-ah ṭum hnih, 2009-ah vawi khat, 2010-ah vawi hnih leh 2012 ah vawi khat a tlawh bawk.

Heng a zinkualnate hi airport-a thlalak leh immigaration counter aṭangin finfiah theih vek a ni.