Council of minister-te chanpual tur sem fel

Prime minister Narendra Modi kaihhruai National Democratic Alliance (NDA) sorkar thara council of minister-te chanpual tur chu Thawhṭanni zan khan sem fel a ni ta.

PM Modi hoa cabinet meeting, Thawhṭanni zana neihah minister-te chanpual tur hi sem fel a ni a, BJP chuan ministry pawimawh zualte an la chan chhunzawm vek. NDA sorkar kal chhuak taa defence minister Rajnath Singh, home minister Amit Shah leh finance minister Niramna Sitharaman-te chuan an chanpual ngai an chang leh a, S Jaishankar pawh external affairs minister a ni leh. Hei vang hian PM kaihhruai body pawimawh tak, national security body member ruattu leh security leh defence sum hman chungchanga thutlukna siamtu, Cabinet Committee on Security (CCS) member-te chu a ngai an la ni chhunzawm dawn a ni.

Sorkar hmasaa cabinet minister, Anurag Thakur leh Smriti Irani te chu paih an ni thung. Irani hi tun ṭum inthlanpuiah khan a tling zo lo a, Thakur erawh tling mah se cabinet-ah dah zui a ni ta lo. Term hmasaah khan Ministry of Information and Broadcasting leh Ministry of Youth Affairs and Sports a chang a, sorkar tharah hian Youth Affairs and Sports chu Dr Mansukh Mandaviya-a'n changin, Information and Broadcasting chu Ashwini Vaishnaw-i'n a chang ve thung.

Cabinet member-a hian BJP thawhpui party dang aṭangin mi panga an awm a, chungte chu Janata Dal (Secular) hruaitu HD Kumaraswamy, HAM-Secular aṭangin Jitan Ram Manjhi, Janata Dal (United) aṭangin Lalan Singh, TDP hruaitu Kinjarapu Ram Mohan Naidu leh LJP (RV) aṭangin Chirag Pawan te an ni.

Sorkar thara minister zingah hian Lok Sabha member ni lo mi 13 an awm a, hetih lai hian Lok Sabha MP atana thlan thar mi 57 an tel. Minister zinga pahnih, Ravneet Singh Bittu leh George Kurian chu Lok Sabha leh Rajya Sabha-ah member an la ni lo ve ve a, hei vang hian an chanvo chelh chhunzawm zel tur chuan lak luh an nih aṭanga thla ruk chhung ngeiin Parliament member atana thlan tlin an ngai dawn a ni.

Chief Minister hlui 4 an awm

Union minister thar zingah hian chief minister hlui pali an tel. An zinga pahnih chu BJP hruaitu niin, a dang pahnih chu Hindustani Awam Morcha (HAM) leh Janata Dal (Secular) hruaitute an ni.

Shivraj Singh Chouhan - Madhya Pradesh chief minister hlui niin BJP hruaitu a ni a, sorkar tharah hian Agriculture and Rural Development Ministry a chang dawn.

Manohar Lal Khattar - Haryana chief minister hlui, kum 70 mi hi BJP hruaitu niin, prime minister Narenda Modi kaihhruai sorkar tharah housing and urban affairs minister atan ruat a ni.

Jitam Ram Manjhi - Hindustani Awam Morcha (HAM) founding president niin, kum 2014, May 20 aṭanga 2015, February 20 chhung khan Bihar chief minister a lo ni tawh a ni. Sorkar tharah hian India economy atana sector pawimawh tak, Ministry of Micro, Small and Medium Enterprises (MSME) ministry a enkawl dawn a ni.

HD Kumaraswamy - Prime minister hlui HD Deve Gowda fapa niin, Janata Dal (Secular) hruaitu a ni a, Karnataka chief minister hlui a ni. NDA sorkar tharah hian heavy industries minister atana ruat a nih bakah, Ministry of Development of North Eastern Region a enkawl dawn bawk.

Minister zinga Lok Sabha member ni lote: NDA sorkar thara council of minister atana ruat zingah Lok Sabha member ni lo eng emaw an awm. Chungte chu -

S Jaishankar - External affairs minister atana ruat nawn, S Jaishankar hi Gujarat aṭangin Rajya Sabha member atan ṭum hnih thlan tlin a ni tawh.

Nirmala Sitharaman - Finance minister thar hi Rajya Sabha atan ṭum hnih thlan tlin a ni tawh a, Andhra Pradesh leh Karnataka aṭangin thlan tlin a ni ve ve tawh a ni.

JP Nadda - BJP national president niin, Rajya Sabha member nilai a ni a, sorkar tharah health ministry a chang ang.

Ramdas Athawale - Republican Party of India (Athawale) president a ni a, Rajya Sabha member a ni. BJP thawhpuiin tun ṭum Lok Sabha inthlanah khan RPI (Athawale) hian Maharastra-ah candidate an siam ve lo. Minister of state atan ruat a ni.

Hardeep Singh Puri - Rajya Sabha MP niin, 1974 batch Indian Foreign Service officer a ni a, kum 2009-2013 khan UN-ah India palai hna a lo thawk tawh. Cabinet minister atan ruat niin, ministry of petroleum and natural gas a chang.

George Kurian - Adovate leh Kerala-a BJP state general securetary nilai a ni.

Satish Dubey - Rajya Sabha MP nilai niin, Brahamin leader a ni.

Sanjay Seth - Busniessman niin, Rajya Sabha member a ni bawk.

Ramnath Thakur - JD(U) hmingin ṭum hnih Rajya Sabha member atan thlan tlin a ni tawh.

BL Verma - Rajya Sabha MP a ni a, minister of state atan ruat a ni.

Prabita Margherita - Assam aṭanga Rajya Sabha MP niin, minister of state atan lak luh a ni.

L Murugan - Rajya Sabha MP a ni a, tun ṭum Lok Sabha inthlanah khan DMK candidate a hneh zo lo a, mahse council of minister atan ruat tel a ni ta tho a ni.

Ravneet Singh Bittu - Ṭum thum Congress MP ni tawhin, kumin inthlan dawnah khan BJP a zawm a, mahse Congress candiate a hneh lo. Mahse NDA sorkar thara minister atan lak luh a ni tho a ni.

Shiv Sena leh NCP an lawm lo

BJP-in NDA hnuaia a thawhpui, Maharashtra chief minister Eknath Shinde kaihhruai Shiv Sena leh Ajit Pawar kaihhruai National Congress Party (NCP) chu NDA sorkar thara cabinet post pek an nih loh avangin an lawm lo hle.

NCP hi Maharashtra-a BJP kaihhruai Mahayuti alliance-ah a tel a, NDA sorkar tharah hian cabinet post an phut a, minister of state pek an tumna chu an hnar a ni.

Shiv Sena MP Sriang Barne pawhin cabinet minister atana an party mi leh sa ruat tel an ni lo chu an lawm lo tih sawiin, minister thlan danah induhsakna an kalpui nasa niin a puh. "Cabinet post hi Shiv Sena hian a chan ve ngei kan lo beisei reng a, hetih lai hian inthlanpuia seat pakhat pawh la lo party-te erawh cabinet-ah ruat an ni thung si," a ti.

Minister atana ruat zingah hian Maharashtra MP paruk an tel a, an zinga pali chu BJP MP niin, Shiv Sena leh RPI (A) in pakhat ve ve an nei bawk.