Africa mi khawihtute hremna pek tiam

External Affairs Minister Sushma Swaraj-i chuan ram chhung hmun hrang hrangah Africa miten kut an tuar chu pawi a tih thu sawiin, pawikhawihtute chu hremna pek ngei a tiam.

Sushma Swaraj-i chuan, "South Delhi-a Africa mite khawih an nih chungchangah Home Minister Rajnath Singh leh Delhi Lt Governor pawh ka be tawh a, anni pawhin misualte chu man thuai an nih tur thu min lo tiam a ni" a ti. Jantar Mantar-a lungawi lohna lantir tum, Africa zirlaite pawh hmu turin Minister of State VK Singh leh Secretary Amar Sinha pawh a hrilh tawh thu a sawi bawk.

Kar kalta Ningani zan khan Delhi-a Africa mi 300 vel chenna hmun, Mehrauli-ah Africa mite chu ṭum thum beih an ni a, police-te chuan he pawikhawihnaa inhnamhnawiha hriat mi panga an man tawh. Thubuai pathum ziah luh a ni bakah, thu zawhfiah turin mi eng emaw zat hren an ni bawk. Africa mi kut tuar zinga pakhat chu puithiam a ni, in lam pana a haw laiin tu tih hriat lohten cricket bat-in an lo vua niin a sawi. Nigeria mi pakhat pawhin biak-ina inkhawm tura a kal chu mi
ṭhenkhatin lo dangin, lung leh bat-ten an lo bei nghal mai niin a sawi.

He thil thlen hma, May 20 khan Congo zirlai , Masunda Oliver chu Delhi-ah thah a ni a, a hnuah South Nigeria zirlai pakhat chu kut thlak a ni leh bawk. Vawiin hian Oliver-a pu chu a ruang la tur hian a rawn thleng dawn a, Ministry of External Affairs chuan Oliver-a chhungte India rama an rawn kalna tur leh, an rama a ruang thawnna tur senso hi tumsak a tum tih a sawi.

Home Minister Rajnath Singh pawhin pawikhawihna thleng ṭhin chu a dem thu a sawi a, "Delhi Police Commissioner hnenah New Delhi-a Africa mi ṭhenkhat kut thlak an nih chungchang pawh ka sawipui tawh a ni. Commissioner chu pawikhawihtute chungah na taka action la tur leh, mitinte himna turin police duty pawh ti tam turin ka hrilh a ni" a ti.

Africa miten kut an tuar fo avangin Thawhlehni hian Africa zirlaite chuan Jantar Mantar-ah lungawi lohna lantir an tum.