India ramah driving licence lem a tam

India rama driving licence awm zinga 30% vel chu a lem a ni a, document lem hmangin mi vaibelchhe nga chuang zetin motor an khalh niin official data chuan a tarlang.

Driving licence lem hmangte hi manchhuah an nih chuan Rs 10,000 chawitir bakah, kum khat thleng jail-ah tantir theih an ni ang. Tuna hremna dan hman mekah chuan Rs 500 chawitir leh a rei berah thla thum chhung jail-a tantir a ni.

Kum tling loa motor khalhte chu a motor neitu emaw, amah enkawltuten hremna na tak an tuar thung ang a, kum thum thleng jail-a tantir bakah, Rs 20,000 chawitir an ni ang a, an motor registration certificate pawh cancel sak an ni nghal ang.

Road Transport and Highways Minister Nitin Gadkari chuan, "Driving licence 30% vel hi a lem a ni a, hengte uluk taka kan dapchhuah a ngai a ni. Driving licence la turte tana computerised test an neihna tur onlien system pawh kan ṭan thuai dawn a ni. Mi tu pawh - politician, official leh mi lar pawh ni se, licence nei tur chuan he test hi an paltlang vek a ngai dawn a ni. Engkim langtlang veka kalpui a ni ang" a ti.

Ministry hian licence vaibelchhe 18 chuang data a lakhawm a, hetaṭang hian vaibelchhe nga vel chu a lem, enfiah zui ngai niin a dah. Hemi hmaa sorkarin survey a buatsaiha, driving licence vaibelchhe ruk zingah a lem nuai 74 a awm tih a lo hmuchhuak tawh bawk.