Puducherry CM atan Narayanasamy ruat

Congress hruaitu hlun leh UPA sorkara union minister lo ni tawh, V Narayanasamy chu Puducherry Chief Minister thar tura ruat a nih thu party thuchhuak chuan a tarlang.

Puducherry assembly inthlan neih takah Congrss party hian assembly seat 30 aṭangin seat 15 a la a, a thawhpui DMK chuan seat 2 a la bawk. CM thar atana V Narayanasamy ruat a nih thu hi party observer, Delhi CM hlui Sheila Dikshit leh All India Congress Committee General Secretary Mukul Wasnik-te chuan an puang.

Hetihlai hian Puducherry Congress president Namassivayam chuan CM post hi a lo beisei ve avangin party thutlukna siamah hian amah thlawptute an lawm lo hle a, buainate an chawk chhuak a ni.

Narayanasamy hi assembly inthlanah hian a chuh ve lo a, hei vang hian CM tura ruat a ni pawh hian mak tih a hlawh hle. CM atana lakluh a nih chuan thla ruk chhungin assembly member atan thlan tlin a ngai dawn a, Congress member thlan tlin zinga pakhatin a seat a ken a ngai dawn a ni.