Nakkumah Covid-19 vaccine pakhat aia tam neih beisei : Harsh Vardhan

Union health minister Harsh Vardhan chuan nimin khan Covid-19 vaccine chu  nakkum kumtir lamah pakhat aia tam neih hman beisei a nih thu a sawi. 

Nimina Group of Ministers meeting-ah Vardhan chuan India-a Covid-19 vaccine enchhinna neih mek hi dose 2 leh dose 3 vaccine an nih thu sawiin, hengte hi enchhinna neih zawh a nih chuan India chuan Covid-19 vaccine pakhat aia tam a nei thei dawn a ni, a ti. 

Vaccine enchhinna neih mek zingah Serum Institute of India leh Bharat Biotech siam chu dose 2 chi niin, Cadila Healthcare vaccine chu dose 3 a ngai thung. Vaccine dangte chu preclinical stage la niin, dose zat tur pawh enchhin mek an ni. 

Ramchhunga vaccine siam, Bharat Biotech leh ICMR thawkdunin an siam leh Zydus Cadila Ltd-in a siamte chu mihringa enchhinna, clinical trial phase 2-na neih mek a ni. 

Anni bakah hian Pune-a Serum Institute of India (SII) chuan Oxford Covid-19 vaccine siam chu mihringa enchhinna, phase 2 human clinical trial chu August thla khan an nei ṭan a, phase 3 pawh a neih thuai rin a ni bawk.   

Vaccine hi enchhinna neih zawh a nih huna mipui tam zawkte hman theih tura sem chhuah a nih theih nan, expert group-ten a tihdan tur an ngaihtuah thu meeting-ah hian Vardhan chuan a sawi. 

Vardhan chuan thlasik lo thleng tur atan mipuite fimkhur turin a chah bawk a, Covid-19 hri leng hi khawvawtah mithiam ten a thi har an ti a ni. 

Hei vang hian khawvawh chhungin hri a darh loh nan mipuite chu punkhawmnaah awm lo tur leh, sorkarin inkaihhruaina a siamte  ngai pawimawha zawm hram hram turin a chah. 

India ramah Covid-19 kai hmuh chhuah thar awm belh reng mah se, hri kai thar zat hi a tlahniam ve zel. Thawhṭannia hri kai hmuh chhuah thar mi 55,342 chu ni 63 chhunga hri kai hmuh thar an tlem ber ṭum a ni. 

Kar nga chhung chu ni tina hri kai hmuh thar zatin hniam lam a pan tawh a, October 9 aṭang khan hri kai mek zat pawh nuai kua an tling tawh lo a ni,  tlakhniam lam a pan zel niin ministry of health and family welfare chuan a sawi. 

Ministry data-in a tarlan danin, hri kai dam tawh recovery rate hi 86,78% a ni a, thihpui zat, fatality rate hi 1.53% a ni bawk.