Army silaimu dahna kangah sipai 20 an thi

Maharashtra-a Pulgaon-a Indian Army-te silaimu dahna hmunpui, Central Ammunition Depot-ah kangmei a chhuak a, sipai 20 an thi a, mi dang 19 in hliam an tuar.

Nagpur bula silaimu dahna hmunah hian nimin zing dar 1.30 khan kangmei hi a chhuak a ni. He hmun hi India rama ammu≠nition centre lian ber a nih bakah, Asia khawmualpuia a lian ber dawttu a ni pha bawk.

Maharashtra Chief Minister Devendra Fadnavis chuan kangmei chhuak hi kangṭhelh motor 10 hmanga ṭhelh a nih hnuin, zing dar 6.15 khan an ṭhelh mit tih a sawi.

Central Ammunition Depot hi Nagpur aṭanga km 110 vela hlaa awm niin, a awmna ram hi acre 10,000 chuang zeta zau a ni. He hmunah hian BrahMos missile leh AK47 mu te dah-
ṭha in semchhuah ṭhin a ni. Sipai officer ṭhenkhat chu silai mu awmkhawmte a puah darh mai loh nana an beihna lamah an thih phah nia sawi a ni.

Prime Minister Narendra Modi-a chuan kangmei chhuaka thi chhungte a tuarpui thu leh, hliam tuarte pawh an dam leh thuai a beisei thu a sawi. Thil awmdan enfiah turin Defence Minister Manohar Parrikar pawh a hmuna kal nghal tura a hrilh thu a sawi. Army Chief General Dalbir Singh Suhag pawhin kang mei chhuahna hmun hi a tlawh nghal bawk.

Kangmei chhuah hnu hian centre bul khuaa chengte chu hmundangah sawnchhuah nghal an ni.

Army chuan kangmei chhuah chhan hi chhui chiang turin thupek a tichhuak nghal a, accident nge hal luih a ni tih an la hre lo tih an sawi.