Modi hi lal ni loin PM a ni : Sonia Gandhi

Congress Party President Sonia Gandhi chuan BJP kaihhruai NDA sorkarin a sorkar kum hnihna a lawm dan chu sawiselin, Narendra Modi chuan India ram lal ni loin, Prime Minister a ni tih a inhriat a ngai a ni, a ti.

Sonia Gandhi chuan, "Hetiang thil hi ka la hmu ngai lo. Lal ni loin Prime Minister kan nei a ni. Narendra Modi hi Prime Minister a ni. Kan ramah retheihna a la nasa a, khawkheng avangin loneitute mangang takin an awm bawk. Hetihlai laia sorkarin nasa taka a lawmna hun alo siam chu thil tihawm niin ka ngai lo a ni" tiin a sawi. Modi-a chu a minister-te chuan lal ang maiah an ngai a, an sorkar kum hnih tlin lawm ringawt buaipuiin an buai niin a sawi bawk.

Congress President hian a bial, Rae Bareli a tlawh mek a ni. A fanu, Priyanka pasal, Robert Vadra chu ralthuama sumdawngte nena inzawmna neia puh a nih chungchangah phiarrukna tenawm tak a awm nia sawiin, an puhna hi chhui chiang turin a phut nghal bawk.

Gandhi chuan, "Nitinin puhna thar an siam a, Congress awmlohna India tia an sawite hi eng nge ? Dawt hmangin mi an puh a, nitinin phatna an zawng leh ṭhin. Vadra chungchang an puhna hi thu dik tak hriatchhuah a nih ngei theihna turin chiang takin chhui ni ngei rawh se" a ti.