Sonia Gandhi foundation plaque lakthlak vangin Congress Party an lungawi lo

Himachal Pradesh-a Atal Tunnel siamna tur lungphum phumtu, Congress hruaitu Sonia Gandhi hming ziah lanna phek (foundation plaque) lak thlak a nih vangin Congress party an lungawi lo hle. 

October 3-a prime minister Narendra Modi-a'n Atal Tunnel hawn dawn khan  Sonia Gandhi hming chuanna, foundation plaque dah bo a ni tih  Himachal Pradesh-a Congress party chuan an sawi a, hemi chungchanga an lungawi lohna hi an state party president Kuldeep Singh Rathore chuan ziakin chief minister Jairam Thakur hnenah a thlen tawh bawk.

Rathore chuan foundation plaque hi dah let leh a nih loh chuan Congress party chuan state sorkar laka lungawi lohna lantirin state pum huap nawrh huaihawt an tum tih a sawi. Sorkar chet dan chu democracy kalphung lo leh dan dik lo a ni, a ti. 

Congress hruaitu Sonia Gandhi hian kum 2010, June 28 khan Manali-a Dhoondi hmuna Rohtang Tunnel project siamna tur lungphum hi a phum a ni. 

Foundation plaque dah bo chung changah hian Himachal Pradesh-a Congress hruaitu pahnih, Gialchhen Thakur leh Hari Chand Sharma chuan Keylong leh Manali-ah chhui turin police hnenah thubuai an thehlut tawh bawk. 

Prime Minister Narendra Modi chuan Himachal Pradesh state-a Rohtang-a siam, khawvela highway tunnel sei ber 'Atal Tunnel' chu October 3 khan a hawng. He lei sei zawng hi km 9.02 a ni a,  Manali leh Leh inkar kawng chu he tunnel kaltlang hian a hmaa an kalkawng zawh ṭhin aiin km 46 velin a tawi phah a, zin chhung pawh darkar li aṭanga darkar nga velin a rei lo phah thei dawn bawk a ni.