Nov 9-ah RS seat 11 ah Inthlang dawn

Election Commission of India (ECI) chuan Rajya Sabha seat 11 -ah November 9-ah inthlan neih a ni dawn tih a puang. Inthlan neihna tur seat 11 zinga seat 10 hi Uttar Pradesh-ah niin, Uttarakhand-ah seat khat a awm bawk. 

November 9-ah vote thlak niin, ni hnih hnuah result puan a ni ang. 

November 25 hian RS member 11 chu an term a zo dawn a,  heng zingah hian union minister Hardeep Puri leh Congress leader PL Punia leh Raj Babbar pawh an tel. Anni bakah term tawp tur member dangte chu Chandrapal Singh Yadav, Javed Ali Khan, Arun Singh, Neeraj Shekhar, Ravi Prakash Verma, Rajaram, Ramgopal Yadav leh Veer Singh-te an ni. 

ECI chuan inthlan neihna turah hian hri darh lohna tur leh hri laka invenna tura sorkarin kaihhruaina a siamte khauh taka kengkawh turin a ti a, a bikin midang hlata awm, social distancing chu kenkawh a ni dawn tih a sawi. 

Tun thla tawp lam, October 28 aṭang hian Bihar assembly inthlan neih a ni dawn bawk a, inthlan hi thawh thuma neih niin November 3 leh 7 ah neih a ni bawk ang. Hripui leng avangin vote thlak chung changah kaihhruaina pawh eng emaw zat siam dang lam niin, vote thlak hun pawh darkar khata pawhsei a ni a, campaign laiin physi­cal campaign neih khap a ni bawk.

November 3-ah state 10-a assembly seat 54-ah by-election neih ani dawn bawk. 

By-election hi Chhattisgarh, Gujarat, Jharkhand, Haryana, Kar­nataka, Madhya Pra­desh, Manipur, Nagaland, Odisha, Telangana leh Uttar Pradesh-ahte neih a ni ang.