June 24 aṭangin 18th Lok Sabha session hmasa ber nei dawn

Central-a sorkar thar lak luh a nih hnuah, 18th Lok Sabha session hmasa ber chu June 24 aṭangin neih ṭan a ni dawn a, July 3 thleng a awh ang.

Parliamentary affairs minister Kiren Rijiju chuan nimin khan 18th Lok Sabha session hmasa ber neih hun tur hi puangin, session ṭan tir ni thum chhung member thlan tharte chu rinawmna thu tiam tira lak luh leh, House Speaker tur thlanna hun atan hman a ni dawn a ni.

President Droupadi Murmu chuan June 27-ah Lok Sabha leh Rajya Sabha joint sitting hmaah thu a sawi dawn a, sorkar tharin kum nga chhunga hma a lak tum dan hrang hrangte a sawi lan rin a ni. Preisdent thusawi zawh hnu hian, prime minister Narendra Modi chuan a council of minister tharte chu Parliament-ah hmelhriattirna hun a hmang bawk ang.

President thusawi chungchanga Motion of Thanks debate-ah boruak a ṭan chhoh hle rin a ni a, eptu lam INDIA bloc chuan issue hrang hrangah NDA sorkar an rawn beih rin a ni.

Rajya Sabha session chu June 27 aṭang hian neih ṭan a ni dawn bawk a, July 3 thleng a awh ang. Hei hi Rajya Sabha session vawi 264-na tur a ni.

17th Lok Sabha thlirletna :

17th Lok Sabha-a session hnuhnung ber chu budget session niin, kumin January 31-February 10 khan neih a ni.

Parliament in hnihte chuan 17th Lok Sabha hun chhung khan bill 221 an pass hman. An thiltih langsar zual zingah hian Jammu and Kashmir special status pekna, Article 370 ṭhiah leh, Jammu and Kasmir state ṭhiat a, union territory pahniha siamte a tel.

17th Lok Sabha-a hian Parliament in hnihte chuan criminal justice system kaihhnawih, bill pathum hming thlakna chu an pawm bawk. Indian Penal Code, 1860, Code of Criminal Procedure, 1973 leh Indian Evidence Act, 1872 -te chu Bharatiya Nyaya Sanhita, 2023; Bharatiya Nagarik Suraksha Sanhita, 2023 leh Bharatiya Sakshya Bill, 2023 chu an pass bawk a ni.

BJP kaihhruai NDA sorkar term hnihna, 17th Lok Sabha chhung khan Lok Sabha chuan Deputy Speaker a nei lo tluan a, hei hi Constitution Article 93 bawhchhiatna nia sawi a ni. Parliament rorel inkhawm hi ni 278 neiin, hemi kum nga term chhungin kum khatah ni 56 zel nei ang an ni.