Tui riral chungchangah report thehlut turin Delhi sorkar hriattir

Supreme Court chuan Delhi khawpuiin tui lama harsatna a tawh mek karah, tanker mafia leh tui tihriral chungchanga hma a lak dan report thehlut turin Delhi sorkar a hriattir.

Justices - Prashant Kumar Mishra leh Prasanna B. Varalle chuan tui semtu tanker beitu, tanker mafia-te chu sorkarin a thunun thei lo a nih chuan, Delhi police-te hma la tura ngen an ni dawn tih a sawi. 'Himachal Pradesh aṭangin tui pek a nih laiin, heng tuite hi khawi hmunah nge an kal ral? Tui baw nasa tak, tihriral leh tanker mafia te an awm a, hemi chungchangah hian eng angin nge hma in lak?" tiin Delhi sorkar chu a zawt. Tui harsatna thlen mek avanga Delhi mipuite manganna chu channel tinah a lang a, hetianga taka tui a van lai hian tui hman ral nasa lutuk tur veng tura sorkar hmalakna hriat an duh thu an hriattir.

Delhi sorkar aiawha ding, advocate Shadan Fast chuan sorkar chuan hma a la reng tih sawiin, tui riral tur venna kawng khat atan tui connection tam tak tihtawp a ni tawh tih a sawi. Hemi chungchang hi court hian vawiinah a ngaihtuah chhunzawm leh ang.