Union minister zingah criminal case nei 28 an awm; Minister zinga 99% crorepati an ni

14th June, 2024

Prime minister Narendra Modi kaihhruai, National Democratic Alliance (NDA) sorkar thara minister 71 zinga 28 chu criminal case nei lai an ni a, 39% a tling. An zinga 19 chuan tualthah tuma puhna, hmeichhe chunga pawikhawihna thleng leh inhuatna chawk chhuak zawnga thusawia puhna thubuai an nei mek.

Poll rights body, Association of Democratic Reforms (ADR) in a tarlan danin, Indian Penal Code section 307 hnuaia tualthah tuma puhna thubuai nei mek hi pahnih an awm a, chungte chu minister of state for ports, shipping and waterways, Shantanu Thakur leh minister of state for education leh Development of North Eastern Region, Sukanta Majumdar te an ni.

Hmeichhe chunga pawikhawihna thlena puha thubuai nei mek hi minister panga an awm bawk. An zingah hian Shantanu Thakur leh Sukanta Majumdar te an tel leh bawk a, anni pahnih bakah minister of state (Mos) for home Bandi Sanjay Kumar, MoS for petroleum and natural gas Suresh Gopi leh tribal affairs minister Jual Oram te an tel bawk.

Minister zinga 99% crorepati an ni

Council of minister thar zingah 99% chu crorepati an ni a, an zinga pakhat chauh a hausak, cheng vaibelchhe hu tling lo a awm.

Union minister zinga crorepati ni lo awmchhun hi Hindustani Awam Morcha (Secular) MP, Jitan Ram Manjhi a ni a, ADR-in a tarlan danin a hausakna hi Rs nuai 30 a ni. Bihar chief minister hlui niin, NDA sorkar thara hian Micro, Small and Medium Enterprises minister atan ruat a ni.

Minister zinga paruk chuan Rs vbc 100 chuang hu an nei. An zinga hausa ber chu Telugu Desam Party (TDP) MP Chandra Sekhar Pemmasani a ni a, a thil neih hlut zawng hi Rs vbc 5,705 a tling. Minister of state for rural development and communication a ni. BJP MP, Jyotiraditya Scindia chuan dawti Rs vbc 424 hu a nei a, Janata Dal (Secular) MP HD Kumaraswamy chuan Rs vbc 217 hu a ni bawk. Rs vbc 100 chuang hu nei zingah hian Ashwini Vaishnaw, Rao Inderjit Singh, Piyush Gopal te an awm bawk.

ADR chuan minister zinga 11 chu thiamna lamah Class 12 an ni tih a tarlang a, hei hi 15% an ni. Minister 57 (80%) chu graduate leh a chung lam niin, pathum chu diploma holder an ni.