Candidate 1,562-te NEET grace mark hnawl June 23-ah exam ṭhat tir leh dawn

NEET-UG 2024 exam result tih chhuah grace mark pek danah thil fel tawk lo a awm a, hei vang hian candidate 1,562 te grace mark chu hnawl sak niin, June 23-ah heng mite hi exam ṭhat tir leh an ni dawn.

NEET-UG 2024 paper leak leh grace mark pek dan dik lo awm nia sawi chungchang hi Supreme Court-ah petition a ni a, justice - Vikram Nath leh Ahsanuddin Amanullah awmna vacation bench chuan a ngaihtuah a ni. Supreme Court hian petition lut chungchangah sorkar laipui leh National Testing Agency (NTA) chu hriattirna a lo pe tawh a, hemi hnu hian sorkar laipui chuan zirlai 1,562 te grace mark chu hnawl a, exam ṭhat tir an nih tur thu hi Court hi a hrilh a ni.

NTA buatsaiha May 5-ah undergraduate medical course entrance test, NEET-UG 2024 neihah khan zirlai nuai 24 vel an exam a ni. Result hi June 14-ah tih chhuah tura tih ni mah se June 4 khan an ti chhuak ta zawk a ni. Mahse hemi hnu hian candidate 1,500 chuangte grace make pek dan a dik tawk lo nia sawiin Supreme Court bakah, High Court pasarihah petition thehluh a ni. June 10 khan hemi chungchang chhui chian phutin zirlai ṭhenkhat chuan Delhi-ah nawrh an lo huaihawt tawh bawk.

Petition theh luhah hian grace mark pek dan chu a fel tawk lo a, zirlai ṭhenkhatin full mark (720) an hmu chu thil theih loh a ni, an ti. Hei bakah full mark hmu zingah hian coaching centre pakhat aṭanga zirlai 67 an tel thu an tarlang bawk a ni.