Eptuten Lok Sabha Speaker post chuh turin TDP leh JD(U) nawr

15th June, 2024

18th Lok Sabha session hmasa ber chu June 24 aṭangin neih a ni dawn a, June 26-ah Lok Sabha Speaker tur thlan a ni ang.

BJP kaihhruai National Democratic Alliance (NDA) chuan Lok Sabha speaker candidate tur hi a la puang lo a, hetih lai hian eptu party-te chuan NDA hnuaia BJP thawhpui party lian pahnih, Janata Dal (United) leh Telugu Desam Party (TDP) te chu Speaker post chuh tur hian an lo nawr ve thung.

Aam Aadmi Party (AAP) chuan TDP leh JD(U) hnenah Speaker chu an party tu emaw zawk zawk aṭanga theh chhuak turin an ngen a, hei hi an party tana a ṭhat bakah, Constitution leh democarcy humhimna atan a pawimawh tel tih an sawi. Hetiang bawk hian INDIA bloc-a tel, Congress leh Shiv Sena (UBP) pawhin Speaker post chuh tur hian TDP leh JD(U) hi an ngen ve bawk.

Rajasthan chief minister hlui, Congress party hruaitu Ashok Gehlot chuan Lok Sabha speaker post chu BJP bawkin a chan leh chuan, TDP leh JD(U) chuan an MP-ten phatsan a, BJP lama an pensan tura an lo inrin lawk a ngai ang, a ti. "TDP leh JD(U) hian BJP-in Maharhstra, Karnataka, Madhya Pradesh, Goa, Manipur, Arunachal Pradesh leh Rajasthan-a sorkar paithlakna tura a phiar ruk dante kha theihnghilh suh se. Heng state tam zawka sorkar paih tla a, party a phel zui chhante kha Speaker thiltih vang a ni," a ti. Kum 2019-ah TDP Rajya Sabha MP paruk zinga paliin BJP an zawm chungchang pawh sawi langin, party in tih theih a nei tawh lo a ni, a ti.

17th Lok Sabha-ah khan BJP chuan party mala seat 303 neiin majority a nei pha a, Speaker-ah Om Birla thlan a ni. A vawi khatna atan 17th Lok Sabha term chhung zawng hian Deputy Speaker thlan a ni lo. 18th Lok Sabha-ah hian BJP chu party mala seat ngah ber la ni mah se, seat 240-ah a tlak thlak tak avangin party malin sorkarna a siam thei tawh lo a, hei vang hian thutlukna a siamna kawngah pawh NDA hnuaia a thawhpui, a bikin TDP leh JD(U) thu a ngaih chan chhoh pawh a ngai dawn ta hle a ni. Hetih lai hian Speaker post chuh tum leh tum loh chungchangah TDP leh JD(U) hian sawi engmah an la nei lo thung.