Kuwait-a in kanga thi mi 45-te ruangin India thleng

Kuwait-a ram danga aṭanga hnathawkte awmna building kanga thi, mi 49 zinga India mi 45-te ruang chu nimin khan Kerala-ah phurh thlen an ni.

Indian Air Force thlawhtheihna, C-130J transport aircraft chuan Nilainia kangmei chhuaka India mi thite ruang hi la in, nimin chawhma dar 10:25 khan Cochin International Airport a rawn thleng a, thlawhtheihnaah hian union minister of state external affairs Kirti Vardhan Singh pawh a rawn chuang a ni.

Kochi an rawn thlen hnuah, ruang an rawn phurh - Kerala mi 31, Tamil Nadu mi 7 leh Karnataka mi 1 chu thuneitute kuta hlan nghal a ni a, ruang dang la awmte chu enfiah an nih hnuah Delhi-ah thawn an ni ang. Kuwait-ah hian kangmei chhuak avanga hliam tuar, India mi 33 chu damdawi-inah enkawl mek an la ni bawk.

Kuwait Fire Force chuan Nilainia kangmei chhuak rapthlak tak chu electric short circuit vanga thleng niin an sawi a, kangmei chhuahna hmun leh a chhuah dante pawh an enfiah tawh thu an sawi. Kangmei chhuahna hmun, Al-Mangaf bulding hi construction firm, NBTC group-in hna thawkte awmna atana a luah a ni a, chhiatna a thlen lai hi hnathawktu 195 vel an khawsa a, a tam zawk chu India aṭanga kal an ni.