Wayanad bialah Priyanka Gandhi Vadra a ding mai thei

Congress party hruaitu, Rahul Gandhi chu Lok Sabha inthlan neih zawh takah khan bial pahnih, Kerala-a Wayanad leh Uttar Pradesh-a Rae Bareli seat aṭangin thlan tlin ve ve a ni a, bial pakhat zawk hi a chhuahsan a ngai dawn.

Rahul Gandhi hian a bial chhuahsan zawk tur hi la sawi chiang lo mah se, Rae Bareli hi Gandhi chhungkaw bial hlun a nih avangin cham chhunzawm a tum zawk nia sawi a ni. Hetih lai hian Wayanad bial a chhuahsan a nih chuan a farnu, Priyanka Gandhi Vadra chu by-election neih hunah a ding mai thei niin Congress hruaitu pakhat chuan a sawi.

Gandhi hian Wayanad bial tlawhin, seat thlan zawk tur a hrethiam lo hle tih pawh a sawi a, mahse hemi hnua a thutlukna siam chuan bial pahnih mipuite a tihlim dawn hle tih a sawi zui. Hei vang hian he bialah hian Priyanka a ding dawn nia ngaihna a awm zui a ni.

Priyana Gandhi Vadra hi Congress party general secretary niin, inthlan campaign-naah pawh a ṭangkai a, a bikin a nu Sonia Gandhi leh a nuṭapa, Rahul Gandh te tan a thawk chhuak nasa hle. Hetih lai hian amah tak erawh chuan inthlan hi a la chuh ve ngai lo thung a, candidate tura an sawmna pawh a la hnar zel a ni. Kum 2019 inthlanpui dawnah pawh khan Varanasi bialah prime minister Narendra Modi a khing dawn nia sawi thawm pawh a awm a, mahse a chuh ta chuang lo a ni.