NEET-UG 2024 buaina SC ruat official chhui chian tir phut

Medical entrance exam, NEET mark pek danah thil fel tawk lo awm nia sawi chungchang chu Supreme Court ruat official-te chhui chian tir a phut thu union minister hlui, Rajya Sabha MP Kapil Sibal chuan a sawi. Hei bakah sorkar laipui chuan state hrang hrangte chu he exam kalpui a ni chhoh dan turte sawpui turin a phut bawk.

Kapil Sibal chuan NEET-UG 2024 buaina chungchangah prime minister Narendra Modi chu beiin, eng examination-ah pawh testing system-a thil dik tawk lo a awm a nih chuan, Prime Minister tana lo ngawih reng chu thil dik a ni lo, a ti.

Sibal chuan political party hrang hrangte chu hemi chungchang hi Parliament session lo awm tura au chhuahpui turin a ngen a, hemi rual hian sorkar lamin sawiho tura a chhawp chhuah zingah chuan a tel a beisei lo tih a sawi zui bawk. Thil mak tak nia a hriat chu tuna sorkar lai hnuaia thil dik tawk lo a awm emaw, eirukna kaihhnawih thil a thleng a nih pawha 'bhakt' in sorkar hmasa, UPA sorkar an mawhpuh zel mai chu a ni tiin, thuchhuahte an siam hmain an lo zirchiang ṭhin lo nia a lan thu a sawi.

NEET-UG 2024 examination hi May 5 khan ram pumah neih a ni a, centre 4,750-ah candidate nuai 24 velin an exam a ni. Mahse a hnuah question paper put ru a awm nia sawi thawmte a awm bakah, mark pek danah thil fel tawk lo a awm nia sawi a ni zui. He exam-ah hian full mark hmu mi 720 an awm a, an zinga mi 67 chu coaching centre pakhata mi a ni. Hemi hnu hian candidate 1,562-te grace mark pek chu hnawlsak lehin, June 23-ah exam ṭha leh tura tih an ni.