G7 Summit kar lakah PM Modi-a'n ram dang hruaitute kawm

Khawvel ram thilithei pasarih, G7 Summit chu Inrinni liam ta khan zawh fel a ni a, he summit chhim tura sawm a nih angin prime minister Nareandra Modi chu Italy-ah a zin a,a zawna G7 summit a chhim ṭum ngana a ni.

Prime Minister Modi hian summit kar lakah ram dang hruaitu ṭhenkhatte a kawm nghal a, an zingah hian Italy prime minister Giorgia Meloni, US president Joe Biden, Japan prime minister Fumio Kishida, France president Emmanuel Macron, Britain prime minister Rishi Sunak leh Ukraine president Volodymyr Zelenskyy te pawh an tel. PM Modi chuan ram dang hruaitute chu India nena thawhdunna ṭha leh zau zawk neih dan turte a sawipui a ni.

Ukraine President Zelenskyy nen an inkawmnaah, PM Modi chuan an ram buaina chinfel a nih theihna turin India chuan theihtawp a chhuah zel dawn tih sawiin, remna leh muanna chu palaite inbiakna kaltlang a ngai a ni, a ti. France President nen chuan ‘Horizon 2047’ hmalakna hmanga India-France inlaichinaa chungchang an thlir let a; defence, nuclear energy, space, education, climate action, digital infrastructure leh connectivity lama thawhdunna chungchangte an sawi. Modi leh Britain PM Sunak-te hian nikum September thlaa New Delhi-a G20 Summit neih ṭum khan meeting an lo nei tawh bawk.

Italy prime minister Giorgia Meloni leh PM Modi te chuan India-Italy thawhdunna chungchangte sawi dunin, tun hnaia patents, designs leh trademarks lama thawhdunna tur, Industrial Property Rights (IPR) a MoU ziah a ni chu lawmawm an tih thu an sawi.