US Mission-in student visa diltu 3,900 chuang interview

India-a US Mission hnuaia Consular Team chuan 8th Annual Student Visa Day an hman denchhenin, June 13 khan student visa diltu zirlai 3,900 an interview tih an sawi.

He ni puala student visa diltu interview-na hi U.S. Consulate General Kolkata-ah pawh neih a ni a, interview bakah diltute leh an chhungte chu US-a lehkha zir dan chungchangte hrilh hriatnate neih a ni bawk. USA aṭanga educational expert-ten zirna kawnga thil pawimawh hrang hrangte an sawipui bawk. Kolkata-ah bik hian zirlai 100 chuang an inlan a ni.

US ambassador Eric Garcetti chuan Indian zirlaite chu a duhsakna a hlan a, zirlai tin chu India tana ambassador an ni tiin, an thawhhona hmangin US-India inlaichinna pawhin hma a sawn zel thei a ni, tiin a sawi.