July 1 aṭangin Criminal Law thar hman a ni dawn

Minister of state (MoS) (Independent Charge) law and justice, Arjun Ram Meghwal chuan Criminal Law thar pathum - Bharatiya Nyaya Sanhita, Bharatiya Nagarik Suraksha Sanhita, leh Bharatiya Sakshya Adhiniyam-te chu July 1 aṭangin hman ṭan a ni dawn tih a sawi.

Minister chuan, 'IPC, CrPC leh Indian Evidence Act te chu thlak an ni tawh dawn," tiin heng dan pathumte thlakna chu July 1 aṭangin hman ṭan a ni dawn a, state zawng zawngah heng dan thar zirchianna tur training facility pawh pek an ni, a ti.

Bharatiya Nagarik Suraksha Sanhita hnuaiah hian police custody chu ni 15 aṭangin ni 90 thlengin pawhsei theih a ni tawh dawn a ni. Bharatiya Nyaya Sanhita hian a thlak tak, IPC-a section 511 awm ṭhin chu section 358 a awm tawh dawn thung a ni. Bharatiya Nagarik Suraksha Sanhita hian section 531 a nei dawn a, a thlak tak CrPC-ah section 484 a awm. Bharatiya Sakshya Adhiniyam-ah hian original-a provision 167 aiah khan provision 170 a awm tawh dawn bawk.

Law Minister chuan criminal law thar hi mi hrang hrang zau taka biak rawn an nih hnuah siam a ni tiin, colonial hun laia siam dan hman chu thlak leh siamṭhat duhna hun rei tak aṭangin a awm tawh a ni, a ti. Dan thar siamna turah hian Chief Justice of India, High Court 16-a Chief Justice, academy 5 leh law univeristy 22 ten rawtna pawh a siam vek tih a, MP leh MLA-te pawh an biak vek thu a sawiin, a tam zawk erawh chuan rawtna engmah an nei lo niin a tarlang.