NCERT textbook aṭangin Ayodhya buaina paih: NCERT hi RSS peng pakhat angin a thawk tawh : Jairam Ramesh

National Council of Educational Research and Training (NCERT) chuan Class 12 Political Science textbook siamṭhain, an siamṭhat langsar zingah 'Babri Masjid' tih chu "three-domed structure" tia thlak a nih bakah, Ayodhya chapter thui zawng pawh phek li aṭangin phek hnihah titawiin, Babri Masjid tihchhiat a nih avanga buaina chhuak leh, President's Rule puan a nih chungchangte paih a ni. A bu hmasaa Babri Masjid chu 16th century mosque, Mir Baqi-a sak tia sawi chu an thlak danglam hnuah, he hmun hi Lord Ram-a pianna hmuna kum 1528-a din, Hindu painting leh lim awmna 'three-domed structure' tiin an tarlang a ni. Hei bakah Hindu leh Muslim hmun inchuh hi 2019-a Supreme Court-in Hindu lam ta tia thutlukna a siam chungchang pawh textbook tharah hian tel a ni bawk. Democratic Rights chapter aṭangin Gujarat-a intualvuakna thleng chungchang chu paih a ni bawk.

NCERT director Dinesh Saklani chuan textbook thlak danglam chu expert-te siam niin, mipuiah buaina leh lungawi lohna thlen an duh loh tih a sawi. Textbook thlak danglam chungchangah amah chuan inhnamhnawihna a neih loh thu a sawi a, mithiamten ṭha an tih anga an ennawn a ni, a ti. Babri Masjid chungchang paih a ni pawh chu Supreme Court thupek a nih thu a sawi bawk.

NCERT textbook siam danglam a nih chungchangah hian inhnialna pawh a tam hle a, Congress party hruaitu Jairam Ramesh chuan institution chu kum 2014 aṭang khan RSS hnuaia mi ang maiin a kal tawh a, ram danpui pawi khawihna lam pawh a pung zel niin a sawi. 'NCERT hi professional institution a ni tawh lo. RSS hnuaia mi angin a awm tawh a ni. NCERT in a tih tur chu textbook ṭha tak siam chhuah a ni, poltical pamphlet leh propaganda-te lo siam ni loin," tiin a sawi. NCERT chuan Nagpur or Narendra Council for Educational Research and Training ni loin, National Council for Educational Research and Training an ni tih an inhriat nawn leh a ngai a ni, a ti.