Bengal-a rel insuah mi 8 an thi

West Bengal-a Darjeeling district-ah nimin zing dar 9 vel khan rel pahnih an insu a, mi pariat thiin mi dang 50 velin hliam an tuar bawk. Thi zingah hian Railway-a thawk mi pathum an tel.

Assam aṭanga Sealdah, Kolkata pana tlan Kanchangjunga Express chu Rangapnai station bulah a hnung lam aṭangin bungraw phur relin a rawn su a, Express train pindan pali leh bungraw phur rel pindan panga an let a ni.

Railway board chairperson Jaya Verma Sinha chuan chetsualna thlenna hmunah hian thawktute thleng nghalin, chhan chhuah hna an thawh nghal thu a sawi a, hliam tuarte chu North Bengal medical college-ah hruai an ni a, enkawlna ṭha tak pek an ni, a ti. Bengal chief minister Mamata Banerjee pawhin doctor leh disaster response team-te chu chetsualna hmunah hian tirh nghal an nih thu a sawi bawk.

Prime Minister Office chuan rel chetsualna thlenga thi chhungte chu zangnadawmna, Rs nuai 2 ṭheuh pek an nih tur thu leh, hliam tuarte chu Rs 50,000 ṭheuh pek an ni dawn tih a puang.

Kanchanjunga Express hi Bengal leh hmarchhaka khawpui pahnih, Silchar leh Agartala inkara tlan ṭhin a ni a, khualzinten Darjeeling kalna atan an hmang fo ṭhin bawk.