Reasi bus beih dan NIA in chhui dawn

Ministry of home affairs chuan tun hnaia Jammu and Kashmir-a Reasi hmuna firfiakten bus an beihna chungchang chhui hna chu nimin khan Natonal Investigation Agency (NIA) kutah a hlan.

Reasi-a inbeihna hi June 9-a thleng kha niin, firfiakten Shiv Khori cave shrine aṭanga Kata pana tlan, biakzinaa kalte phurtu bus chu kapin bus hi kawrah a tla zui a, mi pakua an thih bakah hliam tuar eng emaw zat an awm a ni. He bus-a chuangte hi Uttar Pradesh, Rajasthan leh Delhi aṭanga kalte an ni.

NIA hian thubuai chhui hna hi an lak hnuah FIR pawh a tharin an theh lut zui nghal a ni. Jammu and Kashmir police chuan bus beitu firfiakte chanchin hrilh theitu hnenah lawmman, Rs nuai 20 pek an tiam a, pawikhawihnaa inhnamhnawiha firfiak pakhat lem an ziah pawh an tlangzarh tawh bawk.

Reasi SSP Mohita Sharma chuan firfiakte hian bus hi lo changin an lo kap a, driver hian thunun zo loin kawrah a tla ta tih a sawi. Bus bangah hian silaia kah fuhna laite pawh hmuh tur a awm. Report hmasaah chuan bus beitu hi mi pahnih niin an hmai an tuam a, driver chu an bitum niin an tarlang.