Karnataka-ah ESMA hmang dawn

Police-ten June 4-a nawrh huaihawt an tum avangin Karnataka Chief Minister Siddaramaiah chuan an state-ah Essential Services Maintenance Act (ESMA) hman a ni dawn tih a sawi.

Director-General and Inspector-General of Police Om Prakash chuan thuchhuah siam≠in, nawrh huaihawtnaa telte chu na taka hrem an nih tur thu a sawi bawk.

Police constable-te chuan an hnathawhnaah an dikna palzut sak an ni fo tih sawiin, lungawi lohna lantir nan June 4 hian a huhoa chawlh lak an tum a ni. An hlawh siamṭhat te, an hna hautak lutuk siamṭhat bakah, an fate tana scholarship emaw, zirna pek emaw an phut tel bawk.

Police-te hi sorkar hnathawk dangte anga nawrh phalsak an nih ve loh avangin a huhoa ni khat chawlh lak hi an rel ta a ni. Police-te hi BJP leh AAP chuan an thlawp a, an hlawhbi ennawn sak turin sorkar an phut pui bawk. Mahse state sorkar chuan police-te thil phut hi tihhlawhtlin sak a tum lo.

Essential Services Maintenance Act (ESMA) hi kum 1968 khan siam a ni. He Act hnuaiah hian khawtlang nunphung tibuai zawnga che leh nawrh huaihawtte hian kum khat thleng lungin tantir bakah, pawisa chawitir theih an ni. He Act hi Jammu and Kashmir tih loh state dang zawng zawngah hman theih vek a ni.

State sorkar chuan nawrh huaihawt tumte danna pakhat atan June 4 atanga hriselna ṭhat loh chhuanlama medical certificate lak tum police-te chu engmah pe chhuak lo turin sorkar hospital hrang hrangah a hriattir nghal bawk.

CM Siddaramaiah chuan police-te chuan mipui himna te, dan leh thupek kenkawh chungchangte ngaihtuahin, nawrh hi an huaihawt tur a ni lo tiin, a huhoa chawlh lak chu an remti ngai dawn lo tiha sawi bawk.

Karnataka state-ah hian police 73,000 chuang an awm a, an zinga 60,000 vel chu constable niin, June 4 atana chawlh dilna thehluh hi 30,000 chuang an awm tawh a ni. DGP chuan ADGP, IGP, Police Commissioner leh SP zawng zawng hnenah, June 4 atan tumah chawlh pe lo turin a hriattir tawh bawk a ni.