Court-in Gulberg beihna thubuaiah thutlukna puang

Kum 2002-a Gujarat state-a Godhra Gulberg beihna thubuai chu nimin khan Ahmedabad-a Special Investigation Team (SIT) court chuan a chingfel ta. Mi 24 chu thiam loh chantir an ni a, inhnamhnawiha puh mi 36 te erawh chu thiam chantir an ni thung.

Thiam loh chantir zingah hian VHP hruaitu Atul Vaidhya pawh a tel a, June 6 hian hremna an pek tur chu puan a ni ang. Mi 11 te chu tualthah thubuaia thiam loh chantir an ni a, midang 13 erawh chu thubuai tenau zawkah thiam loh chantir an ni thung. Thiam loh chantir zinga mi pakua chu jail-a tang mek an ni a, midangte erawh chu bail-a chhuahtir an ni thung.

He pawikhawihnaa thubuai hi kum 14 zet ngaihtuah a ni a, thubuai ngaihtuah chhung hian inhnamhnawiha puh mi 66 zing ami paruk chu an thi a ni. Thubuai ngaihtuah lai hian thuhretu mi 338 zet koh an ni bawk.

Kum 2002 February thla khan Gujarat-a Godra khaw bulah Sabarmati Express rel pindan pakhat chu Hindu-ten beiin an hal a, Ayodhya kal haw lam mi 58 an thi. Rel beih a nih hian rel-a chuang mi 250, a zinga a tam zawk chu Muslim upper class, te chu Congress MP hlui Eshaan Jafri-a chenna, Gulbarg Society , Chamanpur-ah inhumhimna zawngin an tlanlut a ni. Mahse Hindu mipui pungkhawmte hian a tuk, February 28 khan hmanrua chi hrang hrang kengin Gulberg-a bungalow 29 leh apartment 10 chu an bei zui leh a, mi 69 an that a ni. Thi zingah hian Ehsaan Jafri pawh hi a tel.

Gulberg Society beih a nih lai hian Jafri hian police, Chief Minister leh central minister-te chu pui tura ngenin vawi eng emaw zat a be hman a, mahse police station hnai ber aṭang pawhin puitu tur tirh an ni lo tih report chuan a tarlang. He thil thlen lai hian Gujarat Chief Minister chu Narendra Modi a ni a, a hnu thlengin beihzui a hlawh phah hle a ni.

Ehsaan Jafri-a nupui, Zakia Jafri chuan kum 2006, June 8 khan complaint thehlutin, police-ten Gulberg beih chungchanga FIR an ziahluhah CM Modi leh pawikhawihnaa inhnamhnawih minister leh official-te telh an ni lo tih a sawi. Kum 2010, March thla khan SIT chuan Modi hi thu zawhfiah turin a ko a, May thla khan Surpeme Court-ah report thehlutin, Modi-a thubuai siamsakna tur finfiahna ṭha tawk a awm lo niin a sawi a ni. Kum 2013 khan Zakia hian petition dang thehlut leh mah se, court chuan Jafri petition hi hnawlin Modi-a lakah thubuai hi siamsak zui a ni ta lo a ni.