Police station-te grade pe dawn

Union Home Minister Rajnath Singh chuan ramchhunga police station-te chu an hnathawh ṭhat dan a zirin grade pek an ni dawn tih a sawi.

The Hindu chanchinbu-in a kawmnaah Rajnath Singh hian he thu hi a sawi a, police tihhmasawnna turin ministry chuan hma a lak thu a sawi. Bureau of Police Research and Development (BPR&D) chuan kawng hrang hranga an hnathawh dan aṭangin police station-te grade pek dan tur hi a siam dawn tih sawiin, hemi atan hian rawtna siam turin state sorkar-te pawh ngenna an thawn thu a sawi bawk.

Minister chuan tourism police siam thar tur pawh ngaihtuah mek a nih thu a sawi a, "Tourism tana police force siam hi kan tum a, training pawh kan pe dawn a ni. Central Industrial Security Force (CISF) chuan paper buatsaihin, hei hi Ministry lamin an enfiah mek a ni" a ti.

Hei bakah hian state tin
aṭanga police officer-te telna, task force on technololy pawh din a ni tawh a, hna an ṭan thei thuai dawn niin a sawi. Singh chuan, "State tina police-te thiltih dan ṭha te khaikhin ang a, hengte hi entawn a, thurawn pe turin state dangah advisor-te kan tir leh dawn a ni. Heng aṭang han police hnathawhna kawnga thil ṭha te chu state hrang hrangte an hre thei dawn a ni"tiin a sawi.