Mathura-a buaina chhuakah mi 24 an thi

Uttar Pradesh-a Mathura khuaah Ningani khan police-ten dan loa Jawahar Bagh-a awmte chhuahtir an tumnaah buaina nasa tak a chhuak a, mi 24 an thi. Police 23 in hliam an tuar bawk. Thi zingah hian Superintendent of Police (City) Mukul Dwivedi leh Farha Station House Officer (SHO) Santosh Kumar Yadav-te an tel.

Jawahar Bagh Park-a dan loa awmte hi Jai Gurudev-a zuitu sakhaw pawl peng pakhat, Bharat Vidhik Vaicharik Kranti Satyagrahi inti te an ni a, acre 260-a zau park-ah hian dan loin kum hnih zet an lo awm tawh a ni. A hma pawhin court chuan an awmna chhuahsan turin thupek lo tichhuak tawh mah se, police-te hian an lachhuak thei lo a ni.

Park aṭanga lakchhuah tuma police kalte hi he hmun≠a awmte chuan lo bei letin, lungin an lo tawng a, a hnuah police te hi silaiin an kap zui an ni. Police-te hian pungkhawmte beihlet nan hian tear gas an hmang zui ve bawk.

District magistrate Rajesh Kumar chuan park-a awmte hian hand grenade-te an hman bakah, thingkungah lawnin police-te hi silaiin an lo kap bawk niin a sawi. Park-a an chenna buk-in eng maw zat a kang bawk niin a sawi. Police-te chuan buaina chhuah lai hian gas cylinder a puak a, kangmei a chhuak zui niin an sawi bawk.

Buaina a chhuah hnu hian Mathrua-ah han police tam zawk dah nghal a ni a, buaina chhuak kaihhnawihah hian police-te chuan mi 250 an man tawk bawk. Buaina chhuahna hmunah hian tualchher pistol 50, rifle, grenade, ngunhnam leh chem eng maw zat chhar a ni.

Uttar Pradesh Chief Minister Akhilesh Yadav chuan Additional Director General of Police (Law and Order) chu buaina chhuahna hmun hi pan nghal turin a hrilh a, inbeihna thlenga thi police pahnih chhungte chu ralna, cheng nuai 20 ve ve pek an nih tur thu a puang.

Satyagrahis-te hian kum hnih kalta khan President leh Prime Minister thlan ṭhin chu tihtawp phutin park-ah nawrh an huaihawt a, an khawsa zui a ni. Nawrh huaihawtte hian pawisa hmanlai mek chu 'Azad Hind Fauj' pawisa hmanga thlak a, diesel litre 60 chu cheng khat-a hralh a, petrol pawh litre 40 cheng khata hralh turin an phut bawk. High Court chuan thuneitute hnenah park aṭanga chhuah tir tur hian thupek a lo tichhuak tawh a ni.

Jai Gurudev hian Mathura-Delhi highway leh UP-a Etawah-ah ashram ropui tak a nei a, a hausakna hi cheng vaibelchhe 12,000 vel zet nia chhuat a ni. A ram neih lut zawng hi Rs vbch 4,000 vel niin, Mercedes leh Plymouths car pawh eng emaw zat a nei a, bank-ah sum Rs vbch 100 chuang a dah bawk. Amah zuituten a ashram-a pawisa an thawhkhawm hi nitin Rs nuai 10-12 vel a tling nia sawi a ni. Kum 2012 khan Gurudeve hi a thi tawh nia sawi a ni bawk.

Uttar Pradesh Director General of Police Javeed Ahmed chuan nimina press conference a neihah, buaina chhuaka thi zingah police pahnih an tel tih sawiin, midang 22 chu Park-a cheng a, buaina siamtute an nih thu a sawi. An mi man zinga 124 chu sorkar thil tihchhia leh tualthah thubuai siamsak an ni tih a sawi bawk.

Police-te chuan Satyagrahi pawl hotu Ram Vraksha Yadav, security officer Chandan Gaur bakah an pawl hruaitu pahnihte lakah chuan National Security Act (NSA) hman a ni dawn tih an sawi. Yadav leh Guar hi anmahni zuitu midang tam takte rualin an tlanchhe hman a ni.