Priyanka Gandhi Vadra-in inthlan a chuh ve dawn ta

Congress party hruaitu, Rahul Gandhi farnu, Priyanka Gandhi Vadra chuan a ṭum khatna atan inthlan a chuh ve dawn ta a, hun rei tak chhung an party mi leh saten inthlan chuh ve tura an ngenna chu a hlawhtling dawn ta.

Kum 52 mi, Priyanka hi Kerala-a Wayanad biala Lok Sabha by-election neih turah a ding dawn a ni.

Lok Sabha inthlan neih zawh takah khan Rahul Gandhi chu Wayanad bial leh, Uttar Pradesh-a Rae Bareli bialah thlan tlin ve ve a ni a, a bial pakhat zawk hi a chhuahsan a ngai a, Rae Bareli bial a vawn zui dawn tak avangin Wayanad-ah hian inthlan ṭhat neih a ngai dawn ta a, a farnu hi a ding dawn ta a ni. Rahul Gandhi chuan Wayanad bial mipuite chungah lawmthu sawiin, an thlawpna zawng zawng avangin a lawm tak zet tih a sawi.

Wayanad biala ding tura tih fel a nih hnuah, Priyanka chuan by-election neih hun tur hi puan la ni lo mah se, inthlan a chuh vawi khatna tur atan hian a zam lo tih a sawi. "Wayanad biala ka ding thei tur hi ka lawm hle a, Rahul Gandhi a awm lo tih hriat loh turin ka bei dawn a ni," tiin, mipui aiawhtu ṭha tak ni tura theihtawp chhuah a tum thu a sawi. Priyanka hi thlan tlin a nih chuan, a nu Sonia Gandhi leh a nuṭapa Rahul Gandhi, an nufa ho chu Parliament member an ni vek dawn a ni. Sonia Gandhi hi Rajya Sabha member a ni mek a ni.

Priyanka hi Wayanad bialah hian tling ngei tura ngaih a ni a, kum 2019 inthlanah khan Rahul Gandhi chuan amah hnaih bertu chu vote nuai 4.31 in a hneh a, kumin inthlanah khan vote nuai 3.64 in a hneh leh bawk.