".001% leka inthlahdahna pawh uluk taka chhui chian a ngai" : Supreme Court

Supreme Court chuan sorkar laipui leh National Testing Agency (NTA) hnenah, undergraduate National Eligibility-cum-Entrance Test (NEET-UG) 2024-a thil fel tawk lo awm chungchangah, ".001% leka inthlahdahna awm pawh ngaihzam theih a ni lo a, uluk taka chhui chian a ngai," tiin a sawi.

Court chuan medical admission atana exam buatsaihtu, NTA chuan a dinnaah nghet taka dinga, NEET-UG 2024 buatsaihnaa tihsual a awm a nih pawhin a tihsual chu a pawm ngam tur a ni, a ti. "Exam buatsaihtu in nih angin dik takin in ti tur a ni. Tihsual a awm a nih chuan, tihsual palh a lo awm a ni, action pawh kan la nghal dawn e, ti mai rawh u. In chet danah midangte rin ngam in hlawh theih phah zawk ang," tiin court chuan a tarlang.

NTA hian NEET-UG 2024 examination hi May 5 khan ram chhunga khawpui 571-a centre 4,750-ah a buatsaih a, candidate hi nuai 24 chuang an awm a ni. Result hi June 4 khan tihchhuah a ni a, mahse hemi hnu hian paper leak leh mark pek dana thil fel tawk lo a awm tih sawiin court-ah hian petition thehluh a ni. Candidate zinga 67 chuan full mark, mark 720 an hmu. Petition hi Supreme Court-a vacation bench, justice - Vikram Nath leh SVN Bhatti awmna chuan a ngaihtuah a ni.