Odisha-ah pawl pahnih intihbuai avangin curfew puang

Odisha-a Balasore khuaah Thawhṭannia Bakri Eid hmannaa ran hlan thisen, kawngpuia luang chungchangah pawl pahnihte nasa takin an intibuai. Buaina chhuak vang hian internet service tih tawp a nih bakah, curfew puan a ni zui bawk.

Bakri Eid puala ran hlanna thisen, kawngpuia hmuh a nih chungchangah pawl pakhat zawk hian lungawi lohna lantirin, sit-in protest an huaihawt a, nawrh huaihawtte hi pawl dangte hian lungin an tawng zui a, buaina a chhuak zui ta a ni. Buaina chhuakah hian hliam tuar eng emaw zat awmin, an zingah hian police-te pawh an tel. Police-te chuan motor 20 vel tih chhiat a ni tih an sawi. Zan lamah pawh pawl pahnihte hi an intibuai zui leh bawk.

Odisha chief minister thar, Mohan Charan Majhi chuan Balasore collector Ashish Thaakre chu biain, buaina chhuak tireh tura hma la turin a hriattir a ni. Chief Minister chuan an state chhung dan leh thupek pal zut zawnga chet lakna chu an ngaizam mai dawn lo tih a sawi.

Buaina chhuak zel tur vengin police 150 vel duty tir an ni a, khawpui chhungah flag march neiin, mi 30 an man tawh niin additional director general of police (law & order) Sanjay Kumar chuan a sawi a, entry point-te pawh khar vek an ni bawk.